Kujabule owamaBoks benqoba kwi-Australia
UPHUPHA ngokuyiphinda ngenduku iNew Zealand umqeqeshi wamaBhokobhoko, uRassie Erasmus ojabulise abalandeli bombhoxo eBhayi ngokunqoba kwiAustralia ngo 23-12 emdlalweni weCastle Lager Rugby Championship obungoMgqibelo eNelson Mandela Bay Stadium.
Nakuba lo mphumela ukhombise izimpawu zokukhula kumaBhokobhoko, ikakhulukazi esiwombeni sesibili, kodwa u-Erasmus uzicabangela indaba yama-All Blacks aseqedile ngesicoco salo mqhudelwano odlalelwayo. INew Zealand iqede ngalesi sicoco ngayo impelasonto lapho inqobe khona kwi-Argentina ngo 35-17 eBuenos Aires.
Lo mqeqeshi uzwakalise ukujabula ngokwenzeke eBhayi kodwa kwacaca ukuthi umqondo wakhe usemdlalweni wokugcina walo mqhudelwano lapho kuzovakasha khona ompetha bomhlaba ngoMgqibelo ePitoli.
“Uma singahlasela ngendlela esenze ngayo eWellington nginesiqiniseko sokuthi sizobaphinda. Vele phela ngeke kube lula ngoba nabo banesithunzi okumele basivikele ngakho-ke bazobe bezobuyisa izinduku. Kulo mdlalo we-Australia ngibone okuningi okungijabulisile. Indlela abebezinikele ngayo abadlali bami ibingaphezulu kwale obekuyiyona sinqoba eWellington ngakho-ke ngineme ngazo zonke izindlela,” usho kanje u-Erasmus ngemuva komdlalo we-Australia.
Noma amaBhokobhoko enqobile lapha kodwa u-Erasmus ubona isidingo sokuqhubeka nokusebenza ngokuzikhandla ngoba kukhona lapho kusaxega khona amabhawodi.
“Amathuba esiwakhile asizange siwasebenzise ngendlela ebengingathanda ngayo kodwa sinaso isikhathi sokulungisa lokhu ngaphambi kokuthi samukele ompetha bomhlaba. Umdlalo ubumuhle kodwa kukhona lapho futhi ebengike ngicabange ukuthi kazi bayayithanda yini abalandeli le nto abayibukayo. Angisiboni nokho isidingo sokugxeka kubadlali bami ngoba besibhekene ne-Australia okuyiqembu elinzima futhi elibophele abadlali abaseqophelweni lomhlaba,” usho kanje lo mqeqeshi obengafihli ukuthi i-Australia bekufanele inenebulwe ngembudlu.
Sisekuwo umbhoxo, iWestern Province iyona kuphela engakashaywa kwiCurrie Cup kulandela ukunqoba kwayo kwiCell C Sharks ngo 50-28 emdlalweni obuseNewlands.