UTembo uphoxekile ehlulwa ukunqoba iMTN8
UMQEQESHI weSuperSport United uKaitano Tembo uthi uphoxekile ehluleka ukunqoba isicoco seMTN8 ekubeni eseshaye izinkunzi zaseSoweto, i-Orlando Pirates neKaizer Chiefs, kweyomkhumulajezi emqhudelwaneni ofanayo.
Amatsatsantsa A Pitori akhale ngaphansi kwiCape Town City FC ehlulwa ngo 4-1 sekukhahlelwa amaphenathi kowamanqamu obuseMoses Mabhida Stadium, eThekwini, ngoMgqibelo ebusuku.
Umdlalo ubuphele ngo 0-0 emizuzwini engu-90, nasesikhathini esengeziwe.
UTembo uthe akwehli kahle ukuthi angafike ashaye zombili izinkunzi zaseSoweto kweyomkhumulajezi, bese kuthi nxa sekufanele aqedele umsebenzi aphikwe yizinto.
Amatsatsantsa A Pitori ehlule iBucs ngo 4-2 sekukhahlelwa amaphenathi kuma-quarter final.
ISuperSport idlulele phambili yahlangana neChiefs kowandulela amanqamu emilenzeni emibili. Kowokuqala badlale ngokulingana kuba ngu 2-2, kwathi kowesibili Amatsatsantsa anqoba ngo 1-0.
Ziye kulo mdlalo iSuperSport kuyiyona ebithwelwe ngeqoma ngenxa yokuthi iyona kadeni ebivikela lesi sicoco eyayisinqobe ishaya iCity ngo 4-2 sekukhahlelwa amaphenathi enkundleni efanayo.
“Ngiphoxekile ukuthi sehlulekile ukuqedela umsebenzi omuhle ebese siwuqalile. Kuhleze kubuhlungu ukufika kowamanqamu, bese wehluleka ukunqoba. Iqiniso ukuthi asidlalanga neze kahle, sehlulekile ukugcina ibhola. ICape Town City idlale kahle kunathi, ngakho kuyifanele ukunqoba lesi sicoco,” usho kanje ngemuva komdlalo uTembo.
Ngokusho kukaTambo, iSuperSport izofunda kokwenzeke ngoMgqibelo. Uthe emdlalweni olandelayo amaphutha bazobe sebewalungisile.
“Singenza kangcono kakhulu kunalokhu esikwenzile. Siyafunda njalo emidlalweni esiyidlalayo, ngingathi njengamanje okubalulekile ukuthi sikhohlwe okusehlele, sibheke emdlalweni wethu olandelayo njengoba sizodlala nePolokwane City emdlalweni we-Absa Premiership,” kusho uTembo.
Umdlalo ukusasa e-Old Peter Mokaba Stadium ngo-7.30 ebusuku.