Kuzosekwa abaseKZN kuma-Idols
UMNYANGO wezobuCiko namaSiko KwaZulu-Natal uzokweseka abaculi besifundazwe asebesele kwiTop 8 yomncintiswano womculo ama-Idols SA.
Njengamanje abaculi baKwaZulu-Natal asebesele emncintiswaneni okhonjiswa ngo-5 ntambama ngeSonto kuMzansi Magic, nguNosipho Silinda (18) waseMnambithi noZamagambu “Xae” Memela (19) wasePinetown.
Okhulumela uMnyango wezobuCiko nobuSiko, uMack Makhathini, uthe: “Sizobaseka ngokuthi sigqugquzele abantu ukuthi babavotele.”
Uthe lokhu yinto abahlale beyenza uma kukhona abaculi besifundazwe asebedlulele ezigabeni eziphambili emncintiswaneni.
Abaculi baKwaZulu-Natal asebake banqoba umncintiswano ngoNoma Khumalo, Vincent Bones noKhaya Mthethwa.
NgeSonto kukhishwe uNtokozo nokusho ukuthi sekusele abayisishiyagalombili abavotelwa ngabantu.
Uhlelo luqale ngokuthi bacule bonke ingoma yeClean Bandit ethi Symphony behambisana neJohannesburg Youth Orchestra.
Kube sekucula kuqala uNiyaaz oshaye ingoma kaHozier ethi Take Me to Church.
UXae ulandele ngengoma kaSolange ethi Cranes in the Sky kwachazeka amajaji, u-Unathi Msengana, Somizi Mhlongo noRandall Abrahams.
UKing B ushaye ingoma eyafika yashisa izikhotha kaZahara ethi, Loliwe. Kube sekulandela uNosipho ocule ingoma kaChristina Auguilera watuswa amajaji.
“Nango-ke uNosipho ebese ngimkhumbule, usebuyile,” kusho u-Unathi.
Abanye abaculi abese besele kube nguLincoln ocule ingoma kaSia ethi Electric Heart, Yanga oshaya iTry Sleeping With A Broken Heart ka-Alicia Keys, Thato ocule ingoma kaShawn Mendez ethi Treat You Better noThando ocule i-As Long As You Love Me kaJustin Bieber.
Ukuvota kuyaqhubeka kanti kuyoze kuvalwe namhlanje ngo-10 ebusuku.
Ukuvotela uXae uthumela iSMS ethi 04 kanti kuNosipho uthumela u-01 ku-37400.