Kuhoxiswe isekhula ebichitha ukuqashwa kothisha ezikoleni
KUGOBE uphondo uMnyangweni wezeMfundo KwaZuluNatal wahoxisa isekhula ebichitha ukuqashwa kothisha kusuka manje kuze kube uDisemba.
Isekhula engunombolo 54 ibikhishelwe izikole ukuze kungaqashwa othisha ngalesi sikhathi njengoba nyakenye ngoDisemba kwavumbuka othisha abaningi abaqashwa sekusele amasonto ngaphambi kokuba kuvalwe izikole ngoDisemba.
UDkt Enock Nzama, inhloko yomnyango, kule sekhula esayinwe ngoSepthemba 17 nonyaka ucacisa ngokuthi kusukela izolo akekho uthisha omusha okumele aqashwe kuze kube uDisemba 31 nonyaka.
Uthe ngalesi sikhathi izikole kumele zihlele uma kukhona uthisha ongekho kwabelwane ngomsebenzi kodwa uma kunezimo eziphuthumayo izikole zingabhala zichaze ukuthi kungani kumele zivunyelwe ukuthi ziqashe othisha betoho.
Kweyokuhoxisa isekhula yangenyanga edlule, uNzama ukhiphe enye isekhula engunombolo 56 esayinwe ngoLwesihlanu olwedlule lapho eveza khona ukuthi izohoxiswa ngoba kusaxoxwa nezinhlaka ezithintekayo.
UMnuz Allen Thompson, uMengameli weNatu, uthe umnyango uzama ngazo zonke izindlela ukungabakhokheli othisha betoho.
Uthe kusuka ngoFebhuwari kunothisha betoho abangaholile njengoba manje umnyango ungasafuni kuqashwe othisha abazosiza ezikoleni.
“Kunothisha ababalelwa ku-1 600 abangakhokhelwe ngumnyango abaqashwa beyitoho. Namanje umnyango uzama ukuthi ungaqashi ngokuthi uthi othishanhloko kumele babhalele wona uma befuna ukuqasha. Abafuni ukukhokhela othisha njengoba nabakwaGrade R besakweletwa imali,” kusho uThompson.
Uthe abahambisani nale sekhula ngoba kunothisha manje asebehanjiselwa amaphepha ezibhedlela.
“Kunomyeni womunye uthisha ongishayele ucingo ekhala ngokuthi akakwazi ukuya elivini yokubeletha ngoba kuthiwe akekho ozovala isikhala sakhe. Inkinga le ngoba othisha kudingeka bamake noma begula ngoba akekho ozokwenza umsebenzi wabo,” kuqhuba uThompson.
USihlalo weSadtu, uMnuz Phumlani Duma, uthe uma umnyango ungafuni ukuxabana neSadtu kumele uyilungise eyale sekhula.
Namhlanje le yunyana inesithangami nabezindaba lapho izochaza okuningi ngale sekhula nangezinye izinto ezithinta ezemfundo.
UMnuz Sihle Mlotshwa, okhulumela umnyango, uthe bahoxise isekhula ngoba befuna ukuxoxa nazo zonke izinhlaka ezithintekayo.
Uthe isekhula ayisho ukuthi kungaqashwa othisha kodwa ithi kumele kube nokwabelana ngothisha esikoleni uma kungenzeka ukuthi kukhona ongekho ngoba kuzoba yinkinga ukuqasha uthisha omusha ngalesi sikhathi.
“Sitshele izikole ukuthi uma zikuthola kunzima lokhu kumele zisazise,” kusho uMlotshwa.
Mayelana nothisha abangaholile, uthe bonke abaqashwa ngokomthetho bakhokhelwa wathi uma kukhona abangakhokhelwe abeze ukuze bathole ukuthi kubambephi.