Umndeni ufuna kuboshwe ababulali
UMNDENI welinye lamabhungu amane abulewe eZangomeni, kwa-K eMlaza, uthi awuphephile emuva kokubulawa kwelungu lawo ngakho ufuna kuboshwe abenze lokhu ukuze bachaze ukuthe bekwenzenjani.
USphamandla Dlamini (22) ubulewe nabangani bakhe oSanele Khuzwayo, Tukelo Nkonka noSiyanda Mncube ngoMgqibelo.
Uninakhulu kaSphamandla, uNkk Glory Buwa, uthe ufuna izimpendulo emuva kokubulawa komzukulu wakhe ngesihluku esingaka.
“Ngelanga lesehlo uSphamandla wayelele kwami usuku lonke. Noma sengithetha ngithi akahlanze igceke wayelokhu ethi ufuna ukuhlala nami. Ebusuku waphuma eyovakashela abangani bakhe kanti ngeke esabuya. Babelokhu bengifihlela ukuthi ushonile ngoba ebe ngowokugcina ukushona esibhedlela. Angazi ngempela ukuthi kungani umzukulu wami ebulewe ngesihluku. Amaphoyisa awabophe ababulali ukuze bachaze kahle. Njengoba bengakaboshwa nje siyesaba siwumndeni ngoba asibazi ababulali, kungenzeke bezobulala nathi,” kusho uNkk Buwa.
Uthe umzukulu wakhe, obesehlala emakhaya, wayeka isikole efunda uGrade 9 eNgonyameni.
“Ubebuyile ngoba ngifuna ukumenzela umazisi kwazise ubesezihlalela emakhaya ePort Shepstone, ubengasathandi ukuhlala eMlaza. Wayeka esikoleni ekhala ngokuthi abafana bangaseNgonyameni bayamhlukumeza,” kusho uNkk Buwa.
UNkk Buwa uthe ngenxa yokuthi badutshulelwe ngasekhaya isibhamu usizwile siqhuma amahlandla amaningi.
Bonke abashonile bakhelene, babulawe behlezi komunye umjondolo.
Kunezinsolo zokuthi babulawe wumphakathi obukhala ngokuthi bebekhuthuza endaweni.
Umndeni kaDlamini ukuchithile lokho wathi bona bebazi ukuthi uyingane eqotho umufi.
“Noma ingane ungeke wazi ukuthi lapho ihamba khona yenzani kodwa lapha ekhaya ubezilungele kabi. Asikaze sizwe nokuthi kukhona umphakathi okhala ngakho mayelana nomzukulu wami nokwenza ngidideke ngempela ukuthi kungani ebulewe nabangani bakhe,” kusho uNkk Buwa.
Okhulumela amaphoyisa esifundazweni, uCaptain Nqobile Gwala, uthe bekungakaboshwa muntu ngokufa kwabo.