Udingisiwe oshaye ingane yazibulala
UDINGISWE wumphakathi waseNkanini eMayville owesifazane osolwa ngokushaya indodakazi yakhe ubusuku bonke eyisola ngokweba uR300 yagcina ngokudla ushevu yazibulala.
U-Angel Mosoaka (15) ushonele esibhedlela saseR K Khan ngoLwesihlanu emuva kokuba unina emshaye ubusuku bonke ngoLwesithathu emsola ngokweba imali yakhe.
Lo mfundi kaGrade 10 kuthiwa ubalekile kubo eMayville waya kugogo wakhe eHammarsdale nokuyilapho ebonwe khona ezibhonqa ngoLwesine esedle ushevu wokubulala ukhula.
Uphuthunyiswe emtholampilo wendawo kwanhlanga zimuka nomoya wabe eseyiswa esibhedlela lapho efike washonela khona.
NgoLwesihlanu unina kamufi, uNkk Ntsepeng Mosoaka, uphume ngesamagundane kule ndawo umphakathi uthi awumqede umsola ngokuhlukumeza ingane nokuba nesandla esiqinile nakomakhelwane njengoba kuthiwa useke wagenca izinja ezintathu ngocelemba ngoba exabene nomakhelwane wakhe.
Usihlalo wekomiti lomphakathi kule ndawo, uMnuz Mlungisi Mokoena, utshele Isolezwe ukuthi abasamdingi endaweni.
“Sicele ukuba athathe izimpahla zakhe ahambe ngoba bekuke kwabikwa ukuthi akahlezi kahle nomakhelwane. Udaba lokushaya indodakazi yakhe ize iphuze ushevu lona luwucike kakhulu umphakathi njengoba ephinde wadelela ngesikhathi sekufike umyalezo wokushona kwengane ethi uyawumema umphakathi uzodla inyama yamahhala emngcwabeni wengane yakhe,” kusho uMokoena.
Oninalume bengane eshonile, oMnuz Joseph Thusi noMatlomula Thusi bathe bafisa aboshwe udadewabo ngalesi sigameko ngoba siyabaphoxa njengomndeni futhi akuyona ingane yokuqala izibulala ngenxa kadadewabo.
“Udadewethu ungitshele ukuthi ingane uyishayile kulandela ukulahleka kukaR300 endlini kodwa bengingazi ukuthi uyishaye ubusuku bonke njengoba kusho omakhelwane. Sidumele kakhulu siwumndeni ngoba ngisuke eMatatiela kuthiwa ingane idle ushevu, endleleni ngathola umyalezo wokuthi isishonile. Udadewethu vele ungumuntu onesandla esiqinile ezinganeni,” kusho uThusi (Matlomula).
Omalume bengane bathe enye ingane kadadewabo yazibulala ngo-2011. Bathe nayo yayineminyaka elingana neyalena eshonile. Kuthiwa yazihilela eHammarsdale ngoba isaba ukuthi unina uzoyishaya ngoba yayilahle ishethi.
Yona kuthiwa yabhala incwadi ivalelisa kunina. Lena eshone ngoLwesihlanu kuthiwa ayizange iyibhale incwadi kodwa ikhale ngempatho kanina.
Kuthintwa uNkk Mosoaka udinwe wathelwa ngamanzi wathi akukho angakuphawula ngalolu daba yena maqede wagaklaza ucingo.
Izolo umndeni ubusayovula idokodo emaphoyiseni ngokushona kwengane kwazise esibhedlela bathe ngeke sidedelwe isidumbu ngaphandle kwecala elivulwe emaphoyiseni.