Kufe ababili endaweni yokucima ukoma
KUFE abantu ababili emuva kokuba indoda igwaze abantu ngommese endaweni yokucima ukoma KwaMashu.
Kuthiwa indoda itheleke endaweni iyimpi ithi ifuna kuphume intombi yayo ngaphakathi ngesikhathi kunomcimbi endaweni yokucima ukoma iMgababa, kwa-C.
UMnuz Sibusiso Mnyandu, umnikazi wendawo yokucima ukoma, uthe namanje basashaqekile ngesenzo okuthiwa senziwe yindoda engumakhelwane nokukholakala ukuthi igcwele amathafa emuva kwento eyenzile.
UMnyandu uthe bekunomcimbi owaziwa ngeSpring Fiesta othathe izinsuku ezimbili kusukela ngoMgqibelo ngesikhathi kwenzeka isehlo entathakusa yayizolo.
Uthe indoda iqale yaxabana nabantu ababehambele umcimbi nabantu nje akade bekhona endaweni yokucima ukoma. “Sithole ukuthi ibifuna intombi yayo kodwa kwawukuthi intombazane nayo ayifuni ukuhamba nayo. Sibe sesiyicela ukuthi ihambe. Ngiyitshele ukuthi ngeke ngiyivumele ukuthi ihambe nomuntu engathandi ngoba kungenzeka agcine elimele. Ihambile kodwa yaphinde yabuya. Ibe isikhipha ummese yalimaza abantu,” kusho uMnyandu. Kuthiwa indoda ibibhokoda wonke umuntu obezama ukuyilamula emuva kokuthi isilande ummese. Kukholakala ukuthi igwaze abantu abathathu kwashona uMnuz Siyabonga Dumakude (26) noMnuz Sthembiso Mbambo abashonele emtholampilo iPolyclinic. Umndeni kaDumakude bewusashaqekile emuva kokuthola ngokubulawa kwakhe ngesikhathi izintatheli zifika khona emini, abanye bebehleli endlini abanye besemnyango besaxoxa ngokwenzekile. THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50.
Uninomncane kaDumakude, uNksz Nonhlanhla Dumakude, uthe bavuswe womakhelwane ekuseni ngehora lesithathu izolo bebabikela ngokulinyazwa kwakhe.
Uthe baphuthumile bathola ukuthi usephuthunyiswe emtholampilo.
“Ngimfice esethule mina ngoba ngesikhathi ngisanda kufika udokotela ucele izihlobo zakhe washo ukuthi akasekho. Ngesikhathi sisekhona emtholampilo bekulokhu kungena abantu abalimele nabo obekushiwo ukuthi bagwazwe wumuntu oyedwa. Naye uSiyabonga kuthiwa uvele wambuza ukuthi uhlaleleni engabaleki uma ebona abanye bebaleka wase emgwaza ehlombe nasesiswini – amathumbu abephumele ngaphandle,” kuchaza uNksz Dumakude obesathukile.
Okhulumela amaphoyisa KwaZuluNatal, uColonel Thembeka Mbele, ukuqinisekisile ukuthi amaphoyisa aphenya amacala amabili okubulala. “Baphuthunyiswe emtholampilo ukuze bathole usizo lwezempilo bafike bashonela khona. Akukaziwa ukuthi bahlaselelweni,” kusho uCol Mbele.