Bashaqekile kubulawa abafana beqembu lengoma
UMNDENI nomphakathi waseSobantu, eMgungundlovu, usathukile ngesigameko sokudutshulwa kubulawe abafana abathathu beqembu lengoma Abadlovozi.
USiyabonga Xolani Hlomuka (16 ), u-Asanda Mbatha (15) noSandile Mbatha (15) bahlaselwe babulawa besemjondolo ngoMgqibelo ebusuku.
AbakwaMbatha kuvele ukuthi bangamawele.
Kulesi sigameko kuthiwa kudubuleke nabanye abathathu okubalwa nentombazane. Imibiko yaphambilini ibiveze ukuthi bane abafana abashonile kodwa kubuye kwavela ukuthi usesibhedlela owesine uyelashwa.
Uninalume kaSiyabonga, uMnuz Sipho Mbatha, uthe namanje kusenzima ukwamukela ukuthi umshana wakhe ubulewe ngale ndlela.
“Umshana wami ubeculela iqembu Abadlovozi okunezinsolo zokuthi yikhona okubadalele amazinyo abushelelezi. Ubeyithanda ingoma futhi ejwayele ukuvakashela abangani bakhe ukuze baqhubeke nengoma yabo. Kumele amaphoyisa nomphakathi besebenzisane ukuze kuboshwe laba ababulele izingane. Akuthina esiwumndeni kuphela esishaqekile kodwa umphakathi wonke ngoba lokhu kungaba yisihlava esibi uma kuqhubeka,” kusho uMbatha.
Isolezwe lithole ukuthi uSiyabonga ubeyingxenye yeqembu iThamboville kodwa ube esesuka ejoyina leli laseSobantu, Abadlovozi. Kusolwa ukuthi yikhona lokhu okususe umsindo njengoba uSiyabonga ubenza kahle kakhulu neqembu lakhe elisha futhi eqhamuka nemidanso emisha.
USiyabonga ubefunda uGrade 8 eSobantu High.
Namhlanje uNgqongqoshe wezokuPhepha KwaZulu-Natal uMnuz Mxolisi Kaunda kulindeleke avakashele imindeni yabashonile abheke nezokuphepha endaweni.
Okhulumela amaphoyisa aseMgungundlovu, uCaptain Gay Ebrahim, uthe bathungatha abasolwa ababulele abantu abathathu.
“Okwamanje akekho oseboshiwe ngalawa macala. Uphenyo lwamaphoyisa luyaqhubeka,” kusho uCaptain Ebrahim.