Buhle ubudlelwane phakathi kwami noRamaphosa: Magashule
UNOBHALA jikelele we-ANC, uMnuz Ace Magashule, useqinisekise umphakathi namalungu enhlangano ukuthi buhle ubudlelwane phakathi kwakhe noMengameli Cyril Ramaphosa.
UMagashule, obekhuluma nabezindaba ngemuva komhlangano wesigungu esiphezulu se-ANC eGoli izolo, uthe ngeke baphumelele futhi ngeke babavumele labo abafuna ukudala uqhekeko phakathi kwakhe noRamaphosa.
Kuke kwaba nemibiko yokuthi uMagashule ungomunye wabaholi abathintekayo etulweni lokuketula uRamaphosa.
“Umhlangano wesigungu esiphezulu uyixoxile eyetulo savumelana ukuthi indaba ixoxwe yizikhulu zenhlangano bese zibika ukuze kuvalwe isahluko ngalolu daba. Mina noMengameli ngeke sivumele abantu abafuna ukusihlukanisa. Sizogxila emsebenzini sisebenzele abantu,” kusho uMagashule.
Uthe manje yisikhathi sokuthi kuqhanyukwe namaqhinga okuthi kukhishwe abantu ebubheni nalabo abafuna ukuhlukanisa inhlangano.
Ugcizelele ukuthi i-ANC iyakwazi ukuxazulula izinkinga esuke ibhekene nazo.
“Sisebenzisana kahle noRamaphosa, asigxilile kwinzwabethi. URamaphosa ungumholi we-ANC kanti kuyangithokozisa ukusebenza ngaphansi kwakhe.”
Ekhuluma engqungqutheleni yeCosatu, uRamaphosa wakhuluma ngalabo abasoleka ekwakheni uzungu wathi kumele kube namaqhinga okutakula abantu ebubheni.
Washeyelwa elikhulu ihlombe ngesikhathi ethi akumele bachithe isikhathi bekhuluma ngezinto ezingayisi inhlangano phambili.
UMagashule umemezele nokuthi umgubho weminyaka ewu-107 kwasungulwa i-ANC, owaziwa ngeJanuary 8 statement, okuyinkulumo yokuhlahla indlela yenhlangano njalo uma kuqala unyaka, uzoba seThekwini ngonyaka ozayo.
Uthe bazokwenza izethulo kwikhomishini ephenya ngokulawulwa koMbuso yidlanzana eyaziwa ngekhomishini kaZondo.
“Sifuna ukucacisa ukuthi kungani sabizela eLuthuli House ezinye zezikhulu zamabhange.
Sizokwenza izethulo ngezinto ezashiwo amabhange. Sisasho namanje ukuthi abanolwazi abaye kwikhomishini.”
Uthe kuzosungulwa amathimba amabili, elizobhekela ukuthi uphiko lwentsha lwenhlangano luya engqungqutheleni ngaphambi kokuphela konyaka nenye ethinta omakadebona, iMKVA, ehlukene phakathi.