‘Bekungeke kugwenywe ukunyuka kukaphethroli’
I-IFP inxuse uMengameli Cyril Ramaphosa ukuthi ahoxise intela ekhokhwa ngabashayeli uma bethenga uphethroli ewuR5.30 elitheni.
Izolo uMnyango wezaMandla umemezele ukuthi uphethroli uzonyuka ngo-99 cents nangoR1 bese udizili unyuka ngoR1.24 cents, upharafini unyuke ngoR1.04 cents ilitha ngoLwesithathu.
UMnuz Mkhuleko Hlengwa, okhulumela i-IFP kuzwelonke, uthe ngenyanga edlule babhalele uRamaphosa incwadi bemcela ukuthi ahoxise intela kaphethroli kodwa akakaze aphendule kuze kube manje.
“Umnotho wethu awukhuli, isibalo sabantu abaswele umsebenzi siyanyuka, intela inyukile kodwa imiholo ayikanyuki. Sekuyisikhawu sika-10 kunyuka uphethroli. Kufanele kuhoxiswe intela ekhokhwa abashayeli uma bethenga uphethroli. Sekuyisikhathi sokuthi uRamaphosa ehlise umthwalo emahlombe abantu,” kusho uHlengwa.
Isazi somnotho esigxile kwezolimo eFNB, uMnuz Paul Makube, sithe ukunyuka kukaphethroli bekungeke kugwemeke ngenxa yokuthi iNingizimu Afrika iwuthenga emazweni angaphandle lapho udayiswa ngeDollar lase-United States.
“Amazwe akhiqiza uwoyela awafuni ukunyusa umkhiqizo wawo lokhu kudala ukuthi kube nophethroli olingene okwenza ubize kodwa uma umningi uyashibha. Kuzozwela kubathengi ngoba ukunyuka kukaphethroli kusho ukunyuka kokudla,” kusho uMakube.
Uthe abantu ngeke babe nemali yokuzikhipha ngoba amasentshana abanawo kufanele benze ngawo izidingo ezibalulekile.
Uveze ukuthi ukudla kuzonyuka ngoba abalimi basebenzisa udizili ukulima, umanyolo namakhemikhali abulala izinambuzane ezitshalweni kuyabiza okusho ukuthi izindleko zizodluliselwa kubathengi.