Ukuzibophezela kweSars kolwamabhonasi
INKAMPANI eqoqa intela kuleli, iSouth African Revenue Services (Sars), izibophezele ekutheni isizofuna imvume kuNgqongqoshe wezeziMali njalo ngaphambi kokuthi ikhiphe amabhonasi ezikhulu zayo.
Lokhu kulandela ukuthi umcwaningi omkhulu wamabhuku, uMnuz Kimi Makwetu, ethole ukuthi iSars iphinde yakhipha amabhonasi acela kuR4.3 million inikeza izikhulu ngaphandle kwemvume kangqongqoshe.
Lokhu kuvele kwisabelomali sakwaSars esethulwe ePhalamende ngeledlule.
UMakwetu uthe ukukhishwa kwamabhonasi ngaphandle kwemvume kangqongqoshe kuphambene nomgomo wokusebenza wakwaSars.
Sekungokwesibili uMakwetu ethola le nkampani isephutheni elilodwa kulandela ukuthi uKhomishana omisiwe, uMnuz Tom Moyane, naye agunyaza ukuthi kukhokhelwe izikhulu amabhonasi acela kuR3 million ngaphandle kokugunyazwa uNgqongqoshe wezeziMali wangaleso sikhathi uMnuz Pravin Gordhan.
Ukukhishwa kwamabhonasi manje sekuyingxenye yamacala abekwe uMoyane obhekene nokuqondiswa ubugwegwe.
UMakwetu uthole ukuthi amabhonasi akhishwe ngaphandle kwemvume kangqongqoshe.
Uthe lokhu kuphambene nomthetho wakwaSars okuthiwa uyaphoqa ukuba kufunwe imvume kangqongqoshe uma kuzokhishwa amabhonasi.
“Iziphathimandla zihlulekile ukusho ukuthi amabhonasi akhishiwe abegunyazwe ungqongqoshe yini,” kusho uMakwetu.
Uthe azikho izinyathelo ezithathiwe zokugwema ukuthi lokhu kungaphinde kwenzeke.
AbakwaSars bona bathi bakhokha amabhonasi kaR4.3 million ngesabelomali sika-2016/17 ngoba babegunyaziwe.
Akucaci ukuthi amabhonasi akhokhwe nini kulo nyaka ngaphansi kukaNene.
UMakwetu uphinde wathola ukuthi iSars ilule inkontileka ethile ngo-2016 ngaphandle kwemvume nokuholele ekutheni kube noR38.1 million osebenza budlabha.
Uthe iziphathimandla azikwazanga futhi ukucacisa ukuthi yalandelwa yini imigomo kwelulwa inkontileka.
Khonamanjalo, iSars ikuvezile ezitatimendeni zayo zezimali ukuthi ibhekene necala lapho omunye owayesebenza kwaSars eyibopha efuna amademeshe kaR58 million.
Lo msebenzi kuthiwa ubebhekene namacala enkohlakalo njengoba ebesolwa ngokuthi uhlangane nosonkontileka bakhwabanisa imali yenkampani enguR11.5 million.
Lo msebenzi utholwe engenacala ngonyaka odlule njengoba manje usefuna amademeshe.
ISars isithole incwadi efuna amademeshe evela kubameli balo msebenzi.