Kuyancomeka okomhlengikazi ovule umtholampilo
USISTER Lungile Zwane ungumhlengikazi osevule umtholampilo ozimele KwaMashu ngoba enothando lwalo msebenzi futhi efisa ukulekelela ngokuphungula umthwalo wokugcwala emitholampilo kahulumeni nokuyiyona abaningi abathembele kuyo.
Sekungokwesibili lo mhlengikazi ophinde abe ngusomabhizinisi evula umtholampilo ozimele njengoba wake wakwenza eminyakeni edlule kodwa wabuye wakhetha ukuyoqashwa ngoba kwakunezinto ezamphazamisa.
Uma echaza udaba ukuze afinyelele lapho esekhona manje, uyasho ukuthi ukuba nothando lomsebenzi kumsizile ngoba miningi imicikilisho adlule kuyo ngaphambi kokuthi agunyazwe ukuvula umtholampilo.
Imicikilisho, imigomo nemibandela imqoka kunoma yiliphi ibhizinisi ikakhulukazi eliphathelene nempilo yabantu ngoba kunezinto okumele zibhekisiswe.
Simshayela ihlombe uSister Zwane ngesibindi sakhe ngoba ukungena emkhakheni wezempilo uzozimela akulula futhi kuyabiza ngoba imishini nokunye okusetshenziswayo ukwelapha kumba eqolo.
Yize zigcwele izinkampani zemitholampilo nezibhedlela ezizimele kodwa abantu abangabanikazi bazo ngabezinye izinhlanga. Imvamisa abamnyama bagcina benamasheya ngenxa yeBEE ngoba ngumkhakha okungelula neze ukungena kuwo uzoba ngusomabhizinisi.
Ngakwenzayo uSister Zwane simbona eyivulandlela futhi siyathemba ukuthi kuzophendlela nabanye iminyango emisha, kungabi ukuthi abantu abamnyama uma bebuka umkhakha wezempilo bawubuke kuphela ngeso lokuqashwa khona kodwa bazi ukuthi nabo bangaba abaqashi.
Okunye okumqoka ngesinyathelo sikaSister Zwane wukuthi isizoshintsha nento yokuthi ukuthola usizo lwezempilo esikhungweni esizimele yinto yabathile kuphela.
Siyathemba ukuthi iphupho lakhe lokwandisa le mitholampilo emalokishini nasezindaweni zasemakhaya lizofezeka ngoba sikhona isidingo sokuthi zengezwe izikhungo zezempilo ezizimele ngoba mkhulu ngempela umthwalo othwele uhulumeni uyadinga ukulekelelwa.