Balungisa amagceke ngamatshe akojantshi
ABANIKAZI bemijondolo eseduze kojantshi bezitimela banesandla ekuphazamiseni ingqalasizinda yezitimela.
Lokhu kushiwo uNgqongqoshe wezokuThutha nokuPhepha KwaZulu-Natal, uMnuz Mxolisi Kaunda ngesikhathi ehlola ukuthi izitimela zihamba kanjani ngemuva kokumiswa kwazo. Izolo ugibele isitimela ebesisuka eMlaza siya eBerea.
“Abanikazi bemijondolo eseduze kukajantshi wesitimela bathatha amatshe afakwa kojantshi balungise amagceke abo ngawo okuholela ekutheni ujantshi undize emoyeni, isitimela singakwazi ukuhamba kuwo,” kusho uKaunda.
Uqhube wathi usazohlangana neMeya yeTheku, uNkk Zandile Gumede noNgqongqoshe woMnyango wezokuBusa ngokuBambisana KwaZuluNatal, uNkk Nomusa Dube-Ncube babonisane ngalolu daba.
UKaunda ubehambisana noKhomishana wamaphoyisa KwaZulu-Natal osabambile, uMajor General Nhlanhla Mkhwanazi.
UMkhwanazi uthe amaphoyisa aphakiwe eziteshini ezihlonzwe njengezinezigameko eziningi zokucekelwa kwezitimela.
“Abacekela isiteshi eMlaza abaphunyukile amaphoyisa asezithendeni zabo,” kusho uMkhwanazi.
UKaunda uthe okuhlalukile emihlanganweni ababe nayo nomphakathi ngesikhathi izitimela zisamisiwe wukuthi abagibeli abaziswa ukuthi izitimela zinenkinga okugcina sekuholele ekutheni babe nolaka.
“Ukushiswa kwezitimela kubonakala sengathi kunenhlese yobugebengu. Abagibeli bayavuma ukuthi kuyabadina ukufika ngemuva kwesikhathi kwezitimela kodwa bayazihlangula kolokuthi yibo abazishisile ngoba bathi bayazidinga. Sizoqhubeka sibe nemihlangano ezocubungula konke okuthinta lolu daba noma sezibuyile izitimela,” kusho uKaunda.
UNksz Fikile Ndlovu ogibela isitimela uthe sebephenduke ihlaya nakubaqashi ngenxa yezitimela.
“Angazi ukuthi kukangaki ngixwayiswa ngokufika emuva kwesikhathi ngiphendule ngokuthi kudalwe yinkinga yesitimela. Uma ngifika sekudlule isikhathi umqashi wami usevele athi nangu ‘u-same story’, okusho ukuthi ngihlale nginenkinga eyodwa. Akugcini ngalelo hlaya ngoba ngibanjelwa imali emholweni wami. Ngineminyaka ngagcina ukuhola imali egcwele kodwa ngiyakuncamela lokho kunokuthi ngikhonjwe indlela. Abantu bagibela ezitimeleni zigcwele balenge ngaphandle baze balimale besaba ukuxoshwa. Siyacela ukuthi iPrasa ikhulume nabasebenzi bayo ngoba abasiphathi kahle uma sibuza ngesitimela basiphendula kabi,” kusho uNksz Ndlovu.
Emzileni osOgwini oluseNyakatho akwaziwa ukuthi izitimela zizobuya nini njengoba ungakavulwa.
UMnuz Zama Nomnganga, okhulumela iPrasa KwaZuluNatal, uthe ingqalasizinda kulo mzila yonakele nokuholela ekutheni izitimela zidluliswe ngasinye ngasinye zifike ngemuva kwesikhathi.
“Sekuqaliwe ukulungiswa, abagibeli bazokwaziswa uma umzila usulungile, sicela basibekezelele,” kusho uNomnganga.
Abadayisa eziteshini bebejabule ngokubuya kwabagibeli abangamakhasimende abo. UNksz Matha Ngubane waKwaMashu, odayisa amakhekhe eDurban Station, uthe ulahlekelwe kakhulu ngesikhathi izitimela zingekho.
“Ngifika ngo 5 ekuseni ngihambe ngo 8.30. Ngeledlule bengize ngigoduke ngo-10 isitokwe singapheli,” kusho yena.