Ziyingozi izifo ezihlasela umuntu isigubhukane
Lesi sifo sihlanganisa: Ukuthi kube nzima ukugwinya ukudla kwabanye namanzi uqobo.
Kokunye ogulayo uba nokuthunukala uma egwinya.
Izilonjana zihlasela umlomo, ulimu intamo, umminzo nezibilini. Kungenzeka lezi zilonda zingaveli olimini nasemlonyeni kodwa zivele zakheleke emuminzweni nengaphakathi lomgudu wokudla.
Uma uthi uyadla ukudla kuba duma.
Isicanucanu esinamandla, ukudla kukunukela kukwenye indlu bese inhliziyo iba nokunenkezela.
Ukuphalaza njalo, nokuya phambili uma uthi ufaka ukudla
Umzimba ungashisa uthi bhe okanye uvele uzipholele nje. Kungenzeka kube khona nokujuluka
Isisu siyaqumba sigcwale umoya usuze kakhulu; abanye size sibakhiphe, indle engamanzi enuka kakhulu.
Kuyaba neziqubu zokunqamuka komoya uma uphefumula, kokunye esimphethe avele acinane kakhulu akhwehlele kambi uma sekunezinsukwana ehlaselekile
Ukuphelelwa ngamandla, ogulayo abe yimvithi aze ahluleke nokukhuluma kokunye avele azinkwankwazele nje.
Ukuqhaqhazela, umzimba ungaxhumani kube nzima ukuhamba.
Kungenzeka umuntu agcine esekhuluma izinto ezingahlangani futhi aphathwe nayikhanda
Lesi sifo siyingozi ephindiwe, baningi abantu esesidlule nabo emhlabeni ikakhulu uma bengelashwa ngendlela eqondile nangokuphelele. Njengoba kubonakala ezimpawini, lesi sifo siyinhlanganisela yokugula okugadle kwenzeka ezindaweni ezehlukene zomzimba. Izilonjana eziqaqela umlomo nomphimbo zisuke zakheke ngenxa yokwehla kwamandla okuvikela umzimba. Uma amasosha omzimba esehlile kakhulu engesenamandla, amagciwana ayavama ukungena adale okuningi ngaphakathi, bese umzimba uqhubheka ungabi namandla. La magciwane abe eseguduza ngegazi agasele ezindaweni ezehlukene kuhlanganisa amathumbu, izizinda zamasosha, amaphaphu, izicubu, ubuchopho nezinye izindawo. Yingakho uthola ukuthi uma lezi zilonjana zisentanyeni kuzoba nzima ukugwinya uze uphalaze, emathunjini zizodala ukukhishwa yisisu okunamandla, emaphashini khona zenza ukukhwehlela, umoya unqamuke uze ucinane. Egazini khona okusamaswayi kuyashoda umzimba uqhaqhazela ushise okanye uphole nje, nomqondo ungadideka, umzimba wona uphelelwe ngamandla kuze kube nzima ukuzihambela. Izimo ezinjena sizibona nsuku zaphuma, abomndeni bafika sebekhathazeke kakhulu ngenxa yokushesha kokugula kulesi sifo. Ukulapha umuntu osegula ngale ndlela kudingeka kwenzeke ngokushesha, kudinga imishanguzo enhlobonhlobo, khumbula ziningi izingxenye zokusebenza komzimba ezithintekayo lapha futhi kumba eqolo kuwe dokotela nakuhulumeni imbala. Mangisho nje ukuthi isikhathi esiningi ukugula osekunjena kuyathanda ukuhambisana nesifo seTB, kuphinde kuncike ekutheni yiziphi ezinye izifo ebezivele zikhona kogulayo nalezo ezizovela ngenxa yokuvunda ngale ndlela komzimba. Ngiyethemba siyabona ukuthi ogula ngale ndlela udinga isikhathi esingakanani ukumhlola ngoba akumele kube khona nokuncane ukunyanyalata esimeni esinjena.
Ukuthuntubezeka amandla emasosheni okuvikela umzimba nakho kunezimbangela zakho ezihlanganisa:
Igciwane lengculazi okanye ingculazi uqobo
Isifo sikashukela esesidlange kakhulu
Isifo seTB, naso esesisabalele sadepha egazini
Umdlavuza osemzimbeni Lukhona nocwaningo oluveza ukuthi indlala uma isidlange yaze yadepha iyakwazi ukwehlisa inani namandla amasosha, bese umzimba ungavikeleki.
Engifisa sikubambisise lapha wukubaluleka kokushesha siye emtholampilo okanye kudokotela uma unezimpawu zalokhu kugula, singalindi nakancane amathonsi abanzi. Lesi sifo siyashesha ukuthubeleza sisabalale emzimbeni ogulayo asheshe aphunduleke avendlenzeke. Asikho isikhathi sokulinda. Asikho! Ukuphalaza okungapheli, okwenza kungangeni okudliwayo kuyingozi ngoba kulahleka amaswayi nezakhi ezibalulekile emzimbeni, ube ungakwazi ukuzibuyisela ngenxa yalesi simo, kukodwa kuyingozi ephindiwe. Mpilonde!