Uvalwa okwesikhashana umtholampilo
UNGQONGQOSHE wezeMpilo KwaZulu-Natal, uDkt Sibongiseni Dhlomo, uqinisekise umphakathi waseMlaza ukuthi yize umtholampilo okwa-V uzovalwa okwesikhashana kodwa lokhu akusho ukuthi ngeke usizakale.
Esitatimendeni esithunyelwe abezindaba, uDhlomo uthe ukuvalwa komtholampilo okwa-V kulandela ukuvakasha kwekomidi lezempilo ngoJulayi elithole ukuthi awukho sesimeni esifanele kwazise wawuyindlu ejwayelekile yaselokishini wase unikelelwa uhulumeni.
Uthe le ndlu eneminyaka ewu-64 ebiwumtholampilo izovalwa bese umtholampilo uthuthela ebhilidini elingaphesheya komgwaqo.
“Okwamanje abasebenzi balo mtholampilo wakwa V bathuthelwe eGateway Clinic esesibhedlela iPrince Mshiyeni. Siyacela abantu baye khona okwamanje. NgeSonto besiye ehostela iGlebelands siyokwazisa umphakathi ngalezi zinguquko. Bekufanele umtholampilo uvalwe ngoJulayi kodwa sakumisa lokho ngoba besifuna ukuchazela zonke izinhlaka ezithintekayo,” kusho uDhlomo.
Ukhale ngokuthi umtholampilo omdala ubusumncane ngenxa yokuthi iziguli beziningi bekuhlangana abantu abanesifo sofuba, abathatha imithi yezifo ezingalapheki nomama abasanda kuthola izingane.
“Uma uza emtholampilo kufanele ulashwe hhayi ukuthi ubuyele ekhaya usugula kakhulu ngenxa yokuthola amagciwane. Uma unesimo esiphuthumayo emtholampilo omdala ubuthola ukuthi awukwazi ukuthi i-ambulensi ingene ngaphakathi kodwa ibipaka emgwaqweni. Ukuphepha kwabasebenzi nokomphakathi bekungekho sezingeni. Ziningi izizathu eziholele ekutheni siwuvale umtholampilo,” kusho uDhlomo. Uthe ngisho abasebenzi bekumele bafake izifonyo nsuku zonke ngenxa yokugcwala kweziguli. UDhlomo uthe bekudingeka ukuthi baxhumane nazo zonke izinhlaka ngaphambi THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50. kokuthi bathathe isinqumo sokuvala umtholampilo, okuhlanganisa imihlangano nekomiti lasemtholampilo, ubuholi bendawo nezinyunyana zabasebenzi.
“Sesikubekile ukuthi kukhona indawo esiyitholile eduze kwesiteshi samaphoyisa okuyisakhiwo soMnyango weMisebenzi yoMphakathi. Sesiziqalile izingxoxo noNgqongqoshe uMnuz Ravi Pillay ukuze sikwazi ukusebenzisa lesi sakhiwo sisenze sibe wumtholampilo,” kusho uDhlomo.
Ucele abantu ukuthi baye emtholampilo oseMshiyeni okwamanje ngoba bazoba nomtholampilo wabo maduze.