Umkhankaso wokuqwashisa ngezifo ezithikameza umqondo
IBHODI elengamele abasebenzi bezempilo abelapha izifo ezithikameza umqondo, iProfessional Board for Psychology, lizophuma umkhankaso wokuqwashisa ngezifo ezithikameza umqondo.
Ibhodi elingaphansi kwenhlangano yabasebenzi bezempilo iHealth Professions Council of South Africa (HPCSA), lizosebenzisa usuku lokuqwashisa ngezifo ezithikameza umqondo, iWorld Mental Health Day, ngoOkthoba 10 ukuqinisa izinhlelo zalo zokuqwashisa ngalezi zifo.
Esitatimendeni esithunyelwe nguNkk Daphney Chuma, okhulumela iHPCSA, ibhodi liveze ukuthi abantu abanalo ulwazi olwenele ngalezi zifo.
“Umkhankaso ubhekele ukuqeda ingcindezi ebekwa kubantu abaphila nalezi zifo nokwenziwa yizinkoleloze kubantu. Ingcindezi efakelwa abantu abasuke bephethwe yizifo ezithikameza umqondo nayo yenza abantu baphuze ukuthola usizo lwezempilo ngoba abantu besaba ukucwaswa wumphakathi,” kusho isitatimende.
Bathe bazimisele ngokuphuma umkhankaso, basabalalise ulwazi kubantu ngezindlela ezehlukene.
Ngeke bagcine ngalolu suku kuphela kodwa bazokwenza kuyo yonke inyanga u-Okthoba.
Bazophinde benze abantu baqonde ngemisebenzi eyenziwa ngongoti abelapha izifo ezithikameza umqondo ngokuqeqeshwa kwabo.
Lokhu kuzosiza ekutheni abantu bazi ukuthi kumele baye kuphi uma bedinga usizo lwezempilo oluthinta lezi zifo.
Ibhodi liphinde laveza ukuthi lifisa kufakwe imali ezinhlelweni zokwelashwa kwezifo ezithikameza umqondo.