UStiga uncoma iSSU ngokunika uTembo ithuba
INKAKHA egijimele iKaizer Chiefs ne-Orlando Pirates uStanton “Stiga” Fredericks incoma iSuperSport United ngokuqasha umqeqeshi oke waba ngumdlali wayo eminyakeni edlule.
Ngokusho kukaFredericks, ukuqashwa kukaKaitano Tembo ukuthi acije elinye lamaqembu ahlonishwayo kuleli kuyizimpawu zokuthi abaphathi baMatsatsantsa a Pitori bayabanakekela abasebenzi beqembu futhi bayabethemba.
UTembo ubelokhu eyiphini lomqeqeshi iminyaka kuleli qembu nokuthe uma kuhamba u-Eric Tinkler ngasekupheleni kwesizini edlule abaphathi beqembu bathi akabambe kuze kuphele isizini.
Kuthe uma kuqala isizini, abaphathi beqembu bamnika ngokuphelele lesi sikhundla. Iphini likaTembo uGodfrey Mosoetsa naye usehlale iminyaka ebalelwa kwewu-16 kwiSupersport.
“Ukuqashwa kukaTembo kuyizinkomba zokuthi iqembu linomlando omuhle wokunakekela abasebenzi balo. Ngokwami lokhu okwenziwa iSuperSport akujwayelekile neze, ikakhulukazi emaqenjini aseNingizimu Afrika. Kwangithusa kwamina uqobo ukuthi abaphathi bathembe uTembo ngalo msebenzi, ngoba ngokwami bengazi uKaitano eyiphini labaqeqeshi kuphelele lapho,” usho kanje uFredericks.
Uthe mkhulu umsebenzi ohlalele uTembo kodwa uyazi ukuthi ulwazi analo ngeqembu ilona oluzomlamulela uma sekuqala ukushuba.
“Umsebenzi awuthathile unzima kakhulu. Kodwa ngoba uthola ukwesekwa ngabaphathi futhi bakhombisa ukumethemba ngokuthi bangayi ukuyofuna umqeqeshi wangaphandle ekubeni yena ekhona, kuzolunga. Nabadlali bafuna ukumdlalela, ngakho kungenzeka agile izimanga. Mina uTembo angimthathi njengomqeqeshi wangaphandle ngoba usehlale iminyaka kuleli, ngakho nakho lokho kuzoba nomthelela omuhle kuyena. Ngifisa nokumncoma ekutheni akabanga yigwala, wancamela ukuba yiphini impilo yakhe yonke. Kunalokho uyamukele inselelo,” kuqhuba uFredericks.
Omunye wabaqeqeshi obeza kahle kwiSuperSport nguThomas Madigage nowashona engozini yemoto ngo-2012. UThabo September, oqeqesha ezinkulisa kwiSuperSport, usanda kutshela leli phephandaba ukuthi ukushayela ihlombe ukuqashwa kukaTembo njengomqeqeshi weqembu labo elikhulu, ngoba nabo kubanika ithemba lokuthi ngelinye ilanga bayogcina beqashiwe ezikhundleni ezinkulu zeqembu. Imidlalo ye-Absa Premiership: Namuhla ngo-7.30 ebusuku: Polokwane City v SuperSport United (New Peter Mokaba Stadium); Highlands Park v Kaizer Chiefs (Makhulong Stadium); Cape Town City v Bidvest Wits (Cape Town Stadium); AmaZulu v Mariztburg United (King Zwelithini Stadium)
Kusasa ngo-7.30 ebusuku: Black Leopards v Baroka FC (New Peter Mokaba Stadium); Orlando Pirates v Lamontville Golden Arrows (Orlando Stadium); Chippa United v Free State Stars (Nelson Mandela Bay)
NgoLwesihlanu: Maritzburg United v Cape Town City (Harry Gwala Stadium, 8pm)