Uchitha eyabaqeqeshwa ngoyise
UMQEQESHI wesibhakela, uStanley Ndlovu, uyasichitha isiphakamiso senhlangano ehlonishwayo emhlabeni i-World Boxing Council (WBC) sokuqeda indaba yabashayisibhakela abaqeqeshwa ngoyise.
Emasontweni edlule, umengameli we-WBC, uMauricio Sulaiman, umemezele ukuthi bazokwenza ucwaningo ukuze bathole ukuthi kufanele yini oyise babashayisibhakela bavunyelwe ekhoneni lamadodana abo. Le nhlangano ikholwa wukuthi ukuba sekhoneni kukayise womshayisibhakela kuyamcindeza kakhulu, agcine eselwa ngisho lokho sekubeka impilo yakhe engcupheni.
Nokho uSulaiman uthe ngeke baphazanyiswe abashayisibhakela asebevele beqeqeshwa ngoyise nokuvamise ukuthi kuqale besebancane. Kulaba bashayisibhakela kukhona umpetha we-WBC welterweight, uShawn Porter wase-USA oqeqeshwa nguyise uKenny Porter noVasyl Lomachenko wase-Ukraine ophekwa nguyise u-Anatoly. Owayengumpetha womhlaba uFloyd “Money “Mayweather ubekade eqeqeshwa nguyise kusukela esemncane.
Esitatimendeni uSulaiman uthe: “Uma uyihlo ekubukela udlala ibhola esikoleni noma udansa noma wenza okunye empilweni, uyayizwa ingcindezi uyingane. Awufuni ukuphoxa uyihlo. Ngakho amabhokisa azogcina esezifaka ezimeni ezingafanele ngenxa yengcindezi yokuba noyise ekhoneni. Lena yinto ebesikade siyibheka. Senza uphenyo, siyacubungula, yisimo esisibhekayo.”
UStanely Ndlovu, oyiqale phansi indodana yakhe uTakalani, waze wayiwinisa ibhande lomhlaba akaliboni iqiniso ngesiphakamiso se-WBC. UTalakani uwine ibhande le-International Boxing Federation (IBF) Super Bantamweight ngo-2011.
“Angiboni kucindeza ukuba khona kukayise webhokisa ekhoneni. Buka kwenzekeni ngoMayweather. Uqeqeshwe nguyise waze wasiyeka isibhakela, engakaze ahlulwe. Umfana wami ngimqale emncane, ngamenza umpetha womhlaba. Besiba khona isikhathi eringini lapho ebengibona khona ukuthi kufanele ngiliphonse ithawula ngoba zimnetha kodwa anginqabele ngoba ezizwa ukuthi usenawo amandla.
“Lokhu ubengakwenzi ngoba ebona mina kodwa ungumuntu onjalo, ongafuni ukuhluleka. Bekungekho ukuthi ngifuna alwe noma kunzima. Mina ngibona kufanele amabhokisa aqeqeshwe ngoyise uma ephatheke kahle ngalokho ngoba kuyiqiniso ukuthi uwena osuke uyazi kahle indodana yakho kunomunye umuntu,” kusho uNdlovu.