OweBafana usephila ngethemba
UKUHLALA isikhathi engadlali ngenxa yokulimala ngeke kumphazamise uBongani “Ben 10” Zungu odlalela i-Amiens SC yaseFrance ngoba yisimo asazi kahle nesike samfica esadlalela iMamelodi Sundowns ngo-2016.
UZungu, osanda kuhlinzwa, uthe uzosebenzisa isipiliyoni abenaso elimele kwiSundowns ukuze asheshe alulame kuthi noma sekunzima aphinde aziduduze ngaso lesi sikhathi (asihlale engadlali kwiDowns).
“Ukube ngiyaqala ukulimala ngale ndlela kwazibani mhlawumbe ngabe ngizivalele endlini angifuni nokuphuma ngibonwe ngabantu kodwa ngoba lesi simo ngiyasazi, kuzolunga,” usho kanje lo mdlali eseFrance.
Kuyona le ligi, uKeagan Dolly weMontepellier naye akadlali ngoba elimele. Yize kunjalo kodwa uLebo Mothiba weStrasbourg uphinde wasuka ebhentshini washayela iqembu lakhe igoli benqoba ngo 3-0 kwiDijon.
Omunye umgadli weBafana Bafana ovutha amalangabi kulezi zinsuku, uDino Ndlovu, ushaye amagoli amabili esiza iqembu lakhe iZhejiang Greentown edlala esigabeni esiphakela esikhulu eChina.
UNdlovu oseshaye amagoli angu-18 emidlalweni engu20 yeligi. Lesi sibalo sesivele sikhulu kunazo zonke aseke azenza kusukela eshiye eNingizimu Afrika. Irekhodi lakhe belingamagoli awu-17 esadlalela i-Anorthosis Femagusta yaseCyprus ayishiye eminyakeni emithathu edlule.
Uphinde wangena esuka ebhentshini nakule mpelasonto uMay Mahlangu weLudogorets yaseBulgaria ngesikhathi izidlela amahlanga ngo 5-1 kwiCherno More okubeke iqembu uMahlangu asanda kulijoyina endaweni yesibili kwi-log. Sekuphele imidlalo emine iBrentford yaseEngland edlalelwa wuKamohelo Mokotjo ingayazi iwini. Kulokhu ibambane kwashunqa uthuli neReading emdlalweni weChampionship yase-England. Kube wubuqhawe bakhe nokho uMokotjo okubuyisele leli qembu iphuzu kwazise ushaye igoli lokulinganisa ekubeni ebesanda kungena esiwombeni sesibili.
UThulani “Cream” Serero uqale umdlalo wakhe wesikhombisa kule sizini kodwa iqembu lakhe iVitesse lavumela iFeyernoord ukuthi ibuye ngemuva ize inqobe ngo 2-1 okushiya leli qembu (Vitesse) endaweni yesikhombisa kwi-log yaseNetherlands.
Kufanele ukuthi uPercy Tau uyohlale ewukhumbula lo mdlalo njengoba ezakhe iRoyale Union Saint-Gilloise zinqobe ngo 3-1 kwiLuven. Ubengomunye wabakhe amagoli obeke leli qembu esicongweni se-log yesigaba esiphakela esikhulu eBelgium.
Akazange adlale yize ebesebhentshini uSiphiwe “Shabba” Tshabalala kwiErzurumspor yaseTurkey ekhale ngaphansi ibhekene nezinkunzi iGalatasaray. Iqembu likaShabba lisemsileni.