ICape Town City ingaba yiqembu eliqinile: McCarthy
UMA iCape Town City ingaqala ishaye amagoli ingaba yiqembu eliqinile, kusho umqeqeshi wayo, uBenni McCarthy.
ICity idle isicoco seMTN8 ngo 4-1 kumaphenathi ngemuva kokuthi umdlalo obuseMoses Mabhida Stadium, eThekwini, uphele ngo 0-0.
Uma ubuwubukela umdlalo ubungeke uphikiswe uma uthi bekumele ezikaMcCarthy ziqede ukuqagela ngokuthi isicoco sizoya kuphi emizuzwini ewu-90.
Kodwa amathuba asobala phakathi kwawo ehlele u-Ayanda Patosi noSiphelele Mthembu aphelele emoyeni behluleka wukuwasebenzisa.
Ephawula kwithelevishini ngemuva komdlalo uMcCarthy ukubeke kwacaca ukuthi iqembu lakhe alikaqini ngokuphelele. Kodwa bekufanele lisidlile isicoco ngenxa ebeliwuphethe ngayo umdlalo.
“Laba bafana kabaziqondi izinto abangakwazi ukuzenza. Lokho ngikubona zonke izinsuku uma siziqeqesha. Kumele siqine ekuqedeleni amathuba. Uma singaqala sishaye amagoli singaba yiqembu eliqine kakhulu. Ngiyajabula kakhulu ukuthi umsebenzi wabo wokuzikhandla ugcine ube nezithelo,” kusho uMcCarthy.
Ngesikhathi umdlalo usesikhathini esengeziwe uke wabonakala ekhuluma nomunye wabadlali bakhe, uThabo Nodada.
Echaza uthe ubemtshela ukuthi “ababe nesibindi, bakholelwe kwabangakwenza noma ngabe izinto zibonakala zingavumi, badlale noma kubuhlungu”.
UNodada nguyena ogcine eshaye iphenathi enqobise ezakhe.
Namuhla iCity izokwamukela iBidvest Wits emdlalweni we-Absa Premiership eCape Town Stadium ngo-7.30 ebusuku.
Lona ngumdlalo wabo wesikhombisa kwiligi kanti iqembu lisanqobe owodwa, owokuvula elishaye kuwona iSuperSport United ngo 2-0 kuyona le nkundla.
Kusukela lapha iqembu likaMcCarthy lisahlulekile wukusebenzisa amathuba okushaya amagoli ngokwanele.
Libambane neLamontville Golden Arrows ngo 0-0 ekhaya, kwaba wu 2-2 libhekene neFree State Stars ekuhambeni, labhaxabulwa yiKaizer Chiefs ngo 4-1 ekhaya lase lithola iphuzu kuba wu 2-2 livakashele i-Orlando Pirates.
IWits esendaweni yesibili kwi-log, izofika kubona ilambele ukunqoba ngemuva kwemidlalo emibili edlule elahle kuyo amaphuzu ishaywa yiPolokwane City ngo 1-0, yabanjwa yiMaritzburg United ngo 0-0.