Owine iProject Runway akaqali ukuwina
“NGIJABULE kakhulu futhi emcimbini wokukhangisa ngemfashini eParis ngizokwenza ngakho konke okusemandleni ukuthi ngiphakamisa igama labantu besifazane hhayi baseNingizimu Afrika kuphela kodwa base-Afrika yonkana.”
Lawa ngamazwi ashiwo uKentse Masilo (26), waseBathanie, eNorth West, okhale wemuka nesicoco sokuqala sohlelo iProject Runway SA, ekade ikhonjiswa kuMzansi Magic njalo ngoLwesibili ebusuku.
Le ntokazi kulolu hlelo izinto beziyihambela kahle njengoba amajaji izikhathi eziningi abeyincoma indlela imithungo yayo ebukeka ngayo.
Ekhuluma neSolezwe uKentse uthe, okwenzekile kusho lukhulu kuye njengoba kuzomvulela iminyango eminingi.
“Ngesikhathi imisiko yami ithola ukunconywa amasonto elandelana kuqhubeka uhlelo, kwangifikela ukuthi kungenzeka ngidle umhlanganiso ekugcineni. Kodwa ukubona akade sinabo benza kahle kungenze ngashaywa uvalo ngazitshela ukuthi kumele nginyuse amasokisi njengoba nabo bengezile ukuzodlala ohlelweni,” kusho uKentse.
Uthe ukuthatha isicoco kulolu hlelo, kungolokuqala kuleli kuyinto angeke ayikhohlwe kalula.
“Ngisuka kude nemfashini njengoba kungekhona okokuqala ukuthi ngiwine entweni ecishe ifane nalolu hlelo. Nasesikoleni ngake ngadla umhlanganiso othisha besicele ukuthi sikhangise ngemisiko ehlukene. Kula ngabona khona ukuth imfashini iyona okumele ngigxile kuyona,” kuchaza yena.
Uthe yize engumuntu ongathandi ukusebenza nabantu abaningi, ewenza kahle umsebenzi uma eyedwa kodwa angathanda ukusebenza eduzane noSandile, Steven noGift nabo akade beyingxenye yalolu hlelo.