Zizosheshe ziqale izinhlelo zokuphepha
ZIZOQALA ngaphambi kwesikhathi esijwayelekile samaholide izinhlelo zokuphepha KwaZulu-Natal.
Lokhu kushiwo uNgqongqoshe woMnyango wezokuThutha nokuPhepha kulesi sifundazwe, uMnuz Mxolisi Kaunda, izolo ngesikhathi ethula ngokusemthethweni izinhlelo ezihambisana nenyanga yezokuthutha ezizokwenziwa umnyango wakhe, eThekwini.
Uthe ukungabi nozinzo kwezokuthutha kubalekisa abatshali zimali yingakho kubalulekile ukuthi ezokuthutha zingabi nezinkinga.
“Sifisa kube nokuthula embonini yokuthutha kakhulukazi embonini yamatekisi okuyiyona kuphela imboni ephethwe ngabantu abamnyama kuleli. Kumele sifunde ukubekezelelana,” kusho yena.
Uqhube wathi lo mnyango usuqalile ukwenza izivimbamgwaqo ezenziwa ngokubambisana nezinhlaka zonke zezokuphepha.
UKaunda, uNgqongqoshe wezokuBusa nokuBambisana KwaZulu-Natal, uNkk Nomusa Dube-Ncube neMeya yeTheku uNkk Zandile Gumede baqale bavakashele erenki yaseClermont neyaseChesterville, esemakethe eThekwini, beqwashisa abagibeli nabashayeli ngezokuphepha.
Ngaphambi kwalokho uKaunda ugasele emafulethini asemadala asenkabeni edolobha ehambisana namaphoyisa kuyobhekwa izidakamizwa.
“Ngithole ukuthi kunenqwaba yamafulethi amadala osekuzingenele kuwo abathile ngokungemthetho, abaqashisa ngawo. Kulawa mafulethi kunabantu abangaphezulu kwesibalo esivumelekile ingasaphathwa eyokuthi vele kumele ngabe awasahlali muntu,” kusho yena.
Uthe ngokubambisana namaphoyisa eTheku bazokwenza isiqiniseko sokuthi abahlala kula mafulethi basemazweni angaphandle banazo izimvume zokuhlala kuleli.
IMeya yeTheku uNkk Gumede ithe njengoba kuqala inyanga yezokuthutha, umasipala uqale uhlelo lokuthi emarenki kube nehhovisi elinendawo yokuhlanganela yikho izolo kuvulwe ihhovisi okuhlolwa ngalo uhlelo erenki yaseClermont.
Usihlalo weSantaco KwaZuluNatal, uMnuz Boy Zondi, uncome isinyathelo sikaNkk Gumede sokwakha amagumbi okuhlanganyela asemarenki.