Bacela kubhungwe ngesifo esihlasela abantu abadala
SEKUNXUSWE abantu ukuthi basabalalise ulwazi ngesifo esiphatha abantu abadala, i-Alzheimer’s, esigcina siholele ekutheni bahlaselwe umphakathi ngoba ubasola ngokuthakatha.
Izolo uMnuz Talent Mabasa we-Alzheimer’s South Africa e-KZN utshele abantu ukuthi abaqale manje ukuxoxa ngalesi sifo bangalindi ngoba sebebona abantu abadala sebehlaselwa. Ubekhuluma emcimbini obuhlelwe nguMnyango wezokuThuthukiswa koMphakathi, KwaZulu-Natal, eMlazi Cinema.
Uchaze lesi sifo njengesidala ukuthi abantu abadala basheshe bakhohlwe bese benza nezinto ezibonakala zingajwayelekile njengokugqoka izinto zangaphansi phezu kwezingubo, ukuhambaze nokunye.
Uthe isikhathi esiningi abantu abadala bagcina bekhohlwa ngisho yimindeni yabo kokunye baduke bangene emizini yabantu ngoba bezitshela ukuthi isemizini yabo.
“Khuluma manje ngalesi sifo ngakini. Ubaxwayise ngalesi sifo. Ungalindi kuze kuhlaselwe ugogo ngoba kuthiwa uyathakatha bese kuba yima uthi akathakathi kodwa uphethwe yi-Alzheimer’s ngoba bazothi besuka bebe bethi uthakatha naye,” kusho uMabasa.
UNgqongqoshe woMnyango wezokuThuthukiswa koMphakathi, eKZN, uNkk Weziwe Thusi, uthe ubone kubalulekile ukuthi aqwashise abantu ngalesi sifo njengaminyaka yonke.
Unxuse abantu ukuthi banakekele abantu abadala njengoba ethe u-Okthoba wonke bawuthatha njengenyanga yabantu abadala.
Abadinga usizo ngalesi sifo sabadala bangathinta i-Alzheimer’s South Africa ku-0860 102 681 noma ku- 031 702 4321/ 702 8811.