Iphoyisa lizibulale nentombi kwasinda isoka
KUBONWA ngokusa esokeni elidutshulwe amahlandla ayisikhombisa yiphoyisa ebelibhangqwe nalo yintombi, ladubula intombi nalo lazingqokloza eWaterloo ngaphandle kwaseThekwini.
UWarrant Officer Mzimela (38), igama elingatholakalanga, obesebenza ophikweni lweCrime Prevention esiteshini sasePhoenix eThekwini ushonele khona lapho nentombi yakhe eneminyaka engu-25 igama layo ebelingakatholakali izolo.
Isoka okuthiwa lingummeli lisindile, laphuthunyiswa esibhedlela. Kuthiwa ummeli uzisize ngokugxuma, waphuma ngewindi ngesikhathi edutshulwa.
Isigameko senzeke ngoLwesithathu ebusuku efulethini okuhlala kulo ummeli. Isolezwe lithole ukuthi ngabo-11 ebusuku iphoyisa ligasele endlini yommeli lafica kukhona intombi yalo.
Kuthiwa intombi izame ukubaleka, layidubula ekhanda.
Kuthiwa ngesikhathi isoka elingummeli liphuma ngewindi iphoyisa belidubula.
Iphoyisa lizingqokloze ekhanda ngenhlamvu lashonela khona lapho.
Okhulumela amaphoyisa KwaZulu-Natal, uColonel Thembeka Mbele uthe bavule icala lokubulala, elokuzama ukubulala nedokodo ngokushona komuntu.
“Isigameko senzeke ngabo23:30 ebusuku ngoLwesithathu, amaphoyisa afice isidumbu sowesifazane oneminyaka engu25 nesowesilisa oneminyaka engu-38 efulethini. Omunye olimalile kulesi sigameko obenamanxeba okudutshulwa uphuthunyiswe esibhedlela ukuze elashwe. Kuyaphenywa ngalesi sigameko,” kusho uMbele.
Kuthintwa okhulumela uphiko lwamacala enziwa amaphoyisa i-Ipid uMnuz Moses Dlamini ukuqinisekisile ukuthi babiziwe endaweni yesigameko.
“Olimele kulesi sigameko sithole ukuthi ungummeli. Siyaliphenya leli cala okuthinteka kulo uWarrant Officer,” kusho uDlamini.
Umthombo weSolezwe osondelene naleli cala uthe iphoyisa kusolwa ukuthi belikade limlandela lo wesifazane labe selimcuthela isikhathi eside ngaphambi kokuba lingene endlini yommeli.
Imizamo yokuthola imindeni yabathintekayo ayizange iphumelele izolo njengoba izinombolo zabo zingatholakalanga.