Umasipala nesikweletu sezigidi
EZOKUNGCEBELEKA Imbongi izobonakala kwiMbewu: The Seed. EZEZINWELE Imibala ibalulekile ehlobo - dlala ngezitayela ezintsha zezinwele. EZOKUVAKASHA -Yenza ucwaningo kuqala ngaphambi kokuba uvakashe wonge imali. EZEMIDLALO - Ungaphuthelwa ezinohlonze ezithinta imidlalo ye-Absa Premiership yeBucs neChiefs eKZN.
- Ingxoxo ekhethekile nomgadli woThongathi FC.
- IDiski yoMhlaba nezithinta umdlalo weLiverpool neMan City.
ISHAYA phansi ngonyawo iMeya yaseMzinyathi, KwaZulu Natal ithi angeke zikhokhelwe izinkampani ezifuna isikweletu sikaR50 million samathenda ayekhishwe yilo mkhandlu kodwa wagcina ungazikhokhelanga.
Lokhu kulandela ukuthi ngoLwesibili kutheleke isikhonzi senkantolo emahhovisi alo masipala aseDundee sizoshaqa izimoto nenye impahla ukuze kukhokheleke izinkampani okuthiwa zanikezwa amathenda kodwa azangakhokhelwa ngomsebenzi wazo.
IMeya yaseMzinyathi, uMfundisi Petros Ngubane iyaveva intukuthelo njengoba ikubeke kwacaca ukuthi sekungamane kuhlanganwe enkantolo ngoba abayingeni eyokukhokhela umsebenzi abangawazi.
Isikhonzi senkantolo kuthiwa sifike kwatatazela izikhulu, zayoncenga ukuba impahla yomkhandlu ingashaqwa.
“Bekonakele ngoba isikhonzi senkantolo besingazwile siphethe umyalelo wokuba sishaqe izimoto eziyisikhombisa zikamasipala nenye impahla ebalulekile. Kube sekwenziwa isivumelwano sokuba okungenani akuxoxwe zingakapheli izinsuku eziyisikhombisa ukuze kutholakale isixazululo,” kusho omunye wabaholi abasemkhandlwini obekhona kufika isikhonzi senkantolo.
UNgubane uthe akekho umuntu abazomkhokhela bungekho ubufakazi bokuthi wawenza umsebenzi. “Laba bantu bazama ukusibamba. Bafuna imali enguR50 million ngomsebenzi abangawenzanga. Njengoba singenile lapha eMzinyathi sithunywe osithumileyo, okunguMntwana waKwaPhindangene ukuba sizokhuculula. Yingakho kuthe uma singena sathola ukuthi ezinye zalezi zinkampani ezifuna inkokhelo ngezindlu zangasese ezithi zazakha, zihlulekile ukusinikeza ubufakazi ukuze sikhokhe,” kusho uNgubane.
Uqhube wathi ezinye bathole ukuthi zafaka ozicelo zenkokhelo eziwumgunyathi nokugcine ngokuba ziphenywe uMcwaningi mabhuku.
Ngesikhathi echaza ukugcizelele ukuthi sekungamane kuhlanganwe enkantolo kodwa abayingeni eyokukhokhela umsebenzi abangawazi.
Uthe abazokwenza ukuthi bazoxhumana nabameli babo ukuba babalucubungule lolu daba.
UNgubane uthe abanye banikezwa umsebenzi wezigidi wokufaka amapayipi amanzi eMsinga, eNquthu naseMvoti kodwa bahluleka.
Uthe yikho lokhu okudale ukuba uMzinyathi ushayeke kakhulu yisomiso ngoba laba asebefuna imali behluleka ukwenza umsebenzi.