USemenya useyinxusa lakwaDiscovery Vitality
KUCHWAZE izihlwele kwasha ingoma umpetha womgijimi, uCaster Semenya, enziwa inxusa elisha emhlabeni lakwaDiscovery Vitality emahhovisi enkampani izolo eGoli.
Ulandele isilomo sombhukudi uChad le Clos nompetha womhlaba ku-400m uWayde van Niekerk.
USemenya ungomunye wezihlabani kwezemidlalo ezihamba phambili emhlabeni obesanda kuqokwa yiNike emhlabeni emkhankasweni wayo olwa nokucwaswa.
Ngesikhathi ekhuluma noNeil Andrews obephethe uhlelo lokumethula, uthe usekuzuze konke ayezibekele kona, manje usegijimela ukujabulisa abalandeli.
“Into yokuqala efikayo (uma esemiqhudelwaneni) wukuthi ngabe abantu bafunani, balindeleni? Konke esengikwenza wukuthi ngenzele bona baziqhenye. Angisazenzeli mina ngoba sengikuzuzile engangizibekele kona,” kusho uSemenya.
Umangaze abaningi ngesikhathi eveza ukuthi ibanga okuyilona azifelayo ngalo wu-1500m.
“Ngiyawuthanda u-1500m, unginikeza inselelo ngoba awazi ukuthi yini engenzeka emjahweni. U-800m ngiyawugijima kodwa angiwukhonzile kangako. Imenenja nomqeqeshi sebengicele bethi angiyeke u-1500m kodwa abasoze baphumelele.”
USemenya (27) uthe isifiso sakhe wukuthatha umhlalaphansi eseneminyaka ewu-40.
“Ngisasalelwe cishe iminyaka ewu-10. Isifiso sami wukuthatha umhlakaphansi sengino-40. Mhlawumbe emidlalweni yami yokugcina yama-Olympic ngiyobe ngigijima emjahweni (42km). Ngeke ngiye nhlobo kumabanga amade kunaleli (amaUltra). Angisoze ngayigijima iComrades, wukuzibulala lokho,” kusho uSemenya.