Umlingisi ugeqa amagula encwadini
IMXABANISE nomndeni wamaJuda omkhulisile incwadi ayibhalile ekhuluma ngempilo yakhe umlingisi owaduma kwiGenerations, oseyisishoshovu samalungelo nezokulingana.
URosie Motene owayaziwa ngoTsego kulo mdlalo, ugeqe amagula izolo kwethulwa incwadi yakhe ethi Reclaiming The Soil ekhethwe wuMasipala weTheku ukuthi ingene ngaphansi komkhankaso i-One City One Book. Kule ncwadi ukhuluma ngokukhuliswa kwakhe umndeni okwakusebenza kuwo unina. Uthe ukukhulela emndenini wabamhlophe bekumdida ngoba ubezibuza ukuthi kungani engafani nabo. Uthe wagcina engawuthandi umndeni wakhe wangempela, abuye wabuyisana nawo esezithole kahle ukuthi ungubani.
“Kukhona okuhle engakuthola kulo mndeni ongikhulisile ngoba ngafunda ezikoleni ezinakho konke. Nokho kwenza ngangazazi ukuthi ngiwubani. Akulula ukukhuliswa olunye uhlanga, ngenye inkolo, okwenza ngangalazi ngisho isiko lami. Ubudlelwano nalo mndeni omhlophe abusebuhle, asisakhulumi nhlobo. Bazama ukungivimba ekubhaleni incwadi kodwa ngabatshela ukuthi ngixoxa ngempilo yami,” kusho uRosie.
Ukhuthaze abazali ukuthi bakhulume ngolimi lwabo nezingane zabo. Uthe ukukhuluma ulimi lwebele ngenye yezindlela zokuxhumana namadlozi. Njengoba esabuyisana nomndeni wakhe osekusele unina nodadewabo, uthe uzama ngayo yonke indlela ukufunda abengakwazi ngesiko lakhe. Ubonge amadlozi ngokuthi ambuyisele kubazali bakhe kusenesikhathi njengoba noyise eshone sebebuyisene.
Mayelana nencwadi yakhe, uthe kumthathe isikhathi ukuthi ayiqede ngoba ubesafuna ukubhodla. Ukungazazi imvelaphi yakhe kwenze agcine ephuza kakhulu utshwala ezama ukuqeda usizi.
“Ngiphile iminyaka eminingi ngizama ukuzithola ukuthi ngiwubani. Kwadingeka ngelulekwe ngokomqondo, udokotela wami wangitshela ukuthi indlela elula yokulwa nobuhlungu ukubhala. Bekunzima ngikhala njalo ngibhala le ncwadi kodwa udaba lwami sengikwazi ukulutshela bonke abaseAfrika,” kusho uRosie.
UMnuz Thembinkosi, Ngcobo oyiNhloko yezamaPaki, ezokuNgcebeleka namaSiko kuMasipala, ubonge uRosie ngokubhala le ncwadi athe umongo wayo yiwona owenza bayikhethe ngoba ikhuluma nawo wonke umuntu.
Uthe ukuzazi kubalulekile, wakhuthaza ukuthi incwadi ifundwe yiwo wonke umuntu ngoba izotholakala emitapweni yolwazi yabo. Kulo mcimbi kuklonyeliswe abafundi bezikole abangu-10 abawine emncintiswaneni obizwa nge-Extreme Reading Challenge.
Abafundi bebengenela ngokuthi bashuthe isithombe befunda incwadi endaweni engajwayelekile.