Ishone isibuyela ekhaya ingane ebiduke nonina
ISHAYISWE yimoto yashona enye yezingane zaseMandawe ebese kuphele inyanga ziduke nonina. UMinenhle (5) obehamba nomfowabo uLindani (2) nonina uNksz Thandeka Msomi ushayiswe yimoto eqeda kwehla esitobhini esiseduze kwakubo, ngoLwesibili.
Leli phephandaba ngoMsombuluko libhale udaba lokuduka kwalaba abathathu okuthiwa balahleka ngoSepthemba 1 beyohola imali yesibonelelo eScottburgh.
Okhulumela amaphoyisa KwaZuluNatal, uColonel Thembeka Mbele, uthe ngokuthola kwamaphoyisa unina walezi zingane uthe ubecasulwe ukuthi uyise wesoka lakhe uyamthuka ngokukipita nendodana yakhe iminyaka ewu-13.
Ngesikhathi ehamba uNksz Msomi uthe wayephethe iselula yesoka lakhe, ezoyisebenzisela ukushayela udadewabo kayise wezingane uNksz Nonhlanhla Mthethwa. Uthe yebiwa ngesikhathi elele eDurban Station eyogibela ibhasi elibangise ePalm Ridge, eGoli, kudadewabo.
Kuthiwa uthe akakwazanga ukuthinta umndeni wesoka lakhe ngoba akanazo izinombolo uneyesoka lakhe kuphela.
“Ngesikhathi behla etekisini uMinenhle weqe kuqala, washayiswa yimoto washona. Amaphoyisa avule idokodo lokubulala ngokungenhloso,” kusho uCol Mbele.
UNksz Mthethwa uthe: “Usizwise ubuhlungu esingeke sibukhohlwe elahleka nezingane zomfowethu. Uma esebuya, enye yazo ishonile. Lo muntu sesihlale naye iminyaka ngoba uyintandane. Kuyacaca ukuthi unayo enye indawo angahlala kuyo kungcono aye kuyo, thina ngeke sisahlala naye.”
Imizamo yokuthola uNksz Msomi ayiphumelelanga ngoba kuthiwa akanalo ucingo.