Ithemba lokunqotshwa kofuba esaphila uYvonne
UNETHEMBA lokuthi singanqotshwa isifo sofuba umculi wakuleli oyinxusa lokuqwashisa ngaso nokudla ngendlela efanele, uYvonne Chaka Chaka.
Umculi ozakhele igama ngokuba yiNdlovukazi yaseAfrika osanda kwethulwa njengenxusa leNew Partnership for Africa’s Development (Nepad) ekuqwashiseni ngofuba nokudla ngendlela efanele, ubengomunye wabebesemhlanganweni wamazwe i-73rd United Nations General Assembly in New York lapho okudingidwe okokuqala izindaba ezithinta ukulwa nokusabalala kofuba, ngesonto eledlule.
Uthe unethemba lokuthi amazwe azokwazi ukulwa nokusabalala kofuba esekhona emhlabeni.
Umbiko wenhlangano yezempilo emhlabeni wonke, iWorld Health Organisation osanda kukhishwa uveze ukuthi balinganiselwa ku-1.6 million abantu abashone ngenxa yofuba nyakenye.
Amazwe azibophezele ekutheni aqede ufuba ngo-2030 kodwa lo mbiko uthi kusekude phambili.
UYvonne uthe kubalulekile ukuthi kufundiswe abantu ukuthi bazivikele nemindeni yabo ekutheni bangangenwa wufuba nokuthi yini okufanele bayenze uma selubangenile noma lungene abantu abasondelene nabo.
“Imfundo nezempilo kubalulekile kakhulu. Uma abantu benolwazi bayakwazi ukudla imishanguzo ngendlela efanele. Ngaphandle kwalokhu kufanele kuqinisekiswe ukuthi nasezikhungweni zezempilo abantu bamukeleka ngendlela efanele – bangacwaswa. Kudingeka nokuthi izikhungo zethu zezempilo zibe nemishanguzo nokuthi abasebenzi bezempilo bavikeleke ukuthi bangalutholi ufuba. Baningi odokotela nabahlengikazi abangenwa wufuba emsebenzini,” kusho uYvonne.
UYvonne obambe iqhaza elikhulu ezinhlelweni zokulwa nokusabalala kwe-malaria nokugqugquzela ukuhlonishwa kwamalungelo abesifazane nezingane, uthe kubalulekile ukuthi uma kwenziwa imigomo yokuqeda izifo kulandelelwe ukuthi kwenziwa ngakho yini ukuthi kufinyelelwe kuyona nokuthi kufanele kubhekwe ukuthi yikuphi okungenziwa ngendlela eyiyo.
Uthe usebenze kakhulu namazwe ahlukene okubalwa namazwe ase-Afrika kodwa ithuba alinikwe yiNepad lizomnika indlela yokuthi abhekane ngqo ne-Afrika yonkana yodwa okuyinto akade ayefisa sengathi ingenzeka.
Uthe kukaningi abantu befika e-Afrika bezokwenza izinto kodwa bengazange babuze ukuthi amazwe ase-Afrika adingani ngakho kubalulekile ukuthi uma amazwe ase-Afrika enayo imali agxile ekulungiseni izinto adinga ukuzilungisa.
UYvonne ukhuluma nje usanda kukhipha i-album entsha esihloko sithi “Keep looking at me” lapho esebenzisana khona nabaculi abahlukene okukhona kubo abaculi abasebasha okuyinto athe uyayithokozela. Kwelinye lamaculo elibizwa ngeJewel of Africa usebenza nomculi osemusha uBerita.