Makubuyekezwe eyemali ekhokhwa esikoleni esiseNdumo
EKHASINI lezezikole kuleli sonto sibhale ngesikole esisha ceke esivulwe eNdumo, iMandla Mthethwa School of Excellence, esinengqalasizinda esezingeni eliphezulu.
Lesi sikole sinezinto ezingekho ezikoleni zabantu abamnyama njengoba sinedamu lokubhukuda, izindawo zokukhanda izimoto, igumbi lamakhompyutha, i-lab yeSayensi nokunye okuningi.
Kukhona abaqeqeshi bokubhukuda, bebhola lombhoxo, i-tennis neminye imidlalo. Okwamanje lesi sikole sisafundisa uGrade 8 kuphela kanti amabanga azolokhu engezwa unyaka nonyaka sigcine sesifika kwa-matric.
Ngokusho kwalowo owayenguNgqongqoshe wezeMfundo noNdunankulu KwaZulu-Natal, uMnuz Senzo Mchunu, inhloso yokwakhiwa kwalesi sikole kwakuwukuthi izingane zaseNdumo zithole imfundo esezingeni eliphezulu.
UMchunu uthe akusona lesi sikole kuphela okwakukhulunywe ngokuthi sakhiwe ngenhloso yokuphucula imfundo efundwa yizingane zasemakhaya ngokuthi zibe nezinto zesimanjemanje kodwa zikhona nakwezinye izindawo njengaseMsinga.
Umbono nesinqumo sikahulumeni kuyancomeka. Nokho kuyakhalisa ukuthi sengathi abantu okuyibona okwakuhloswe ukuthi bahlomule ngalesi sikole - okuyizingane zaseNdumo abazukuhlomula njengoba imali yokufunda kusona imba eqolo.
Izingane ezifunda kuso zihlala emakhaya zikhokha uR12 000 bese kuthi ezihlala ngaphakathi zikhokhe uR32 000.
Kunenqwaba ezovaleleka ngaphandle ngenxa yale mali ekhokhwa kulesi sikole futhi kuyadingeka uhulumeni achaze ukuthi umthetho wakhona lesi sikole sakhelwe ukuthi kufunde izingane zomntakabani kuphela yini kusona?
Kwenzeka kanjani ukuthi sekusetshenziswe imali engaka kahulumeni (R298 million) kodwa bese kuthi uma sesivulwa isikole kube kungukuthi kuzoba yidlanzana elizokwazi ukufunda kusona?
Kuseyisikole sikahulumeni esakhelwe ukuhlomulisa umphakathi owakhiwe kuso noma eNdumo kwakufuneka umhlaba nje kuphela kodwa inhloso kungesikho ukusiza izingane zendawo?
Idinga ukubuyekezwa eyemali ekhokhwa kulesi sikole.