Asingeni ekutheni abantu baphethwe wubani
MHLELI: Ngiphendula incwadi ebhalwe ngozibize ngokuthi unguSenzani J Ngubane (uMntwana), ebinesihloko esithi: njalo kukhona abaqaphe umnyango ukuthi konke okwenzayo kusemthethweni yini. Lapha ngibala iNdlunkulu kaZulu esingabikwa kuyo uma singenzi ngakho, izindlu zobuHoli boMdabu, iKhabhinethi yesiFundazwe, iPhalamende, ngisho nezinhlaka zomthetho ezihlanganisa iNkantolo yoMthethosisekelo. Akulona iqiniso ukuthi singenza okuphambene nomthetho singakhalinywa yilezi zinhlaka.
Kufanele umphakathi wazi ukuthi kulolu daba uMbovu akhuluma ngalo kube namakhomishini amabili azimele aphume nezinqumo. Ngeke ngingene endikimbeni yezinqumo ngenxa yokuhlonipha umthetho. La makhomishini azimele akuwona awomnyango. Umnyango uyaye uzame ukuhlanganisa imihlathi eyazanayo (imindeni) ukuba ixazulule izinkinga ngendlela enokuthula. Siyaqinisekisa ukuthi Mbovu akukho okufihliwe futhi umnyango wethu awuchemile. Ngikusho lokhu ngoba lapha KwaZulu-Natal kunezindawo zamakhosi ezingaphezu kuka-300. Kungani kuzothiwa umnyango uchemile ebukhosini obubodwa?
Kuyaziwa ukuthi kuhlale kunabantu abahlale bebunconsela amathe ubukhosi kusukela emandulo yingakho imibango ihlale ikhona emindenini. Ngingakuqinisekisa ukuthi ngisho uNgqongqoshe womnyango, uNkk Nomusa Dube-Ncube, eseyinxusa ngaphandle kwaseNingizimu Afrika imibango yobukhosi ibilokhu ikhona. IKhomishini kaNhlapho okhuluma ngayo yakhiwa engekho. Ngosuku lokuqala wayithola ikhona ngoba phela kuthiwa umbango usuka esweni. Cishe alukho usuku lapho kungangeni khona izinsolo zokuthi ubani akasafanele ukuba yinkosi ngoba kutheni kwathini. Okwethu wukuba siyalele labo abazibona ukuthi izihlalo zobukhosi kufanele zinganyelwe yibona ukuba balandele imigudu efanele ngoba uhulumeni wazikhipha kudala wathi azihlaziywe zilungiswe ngendlela ezimele nemindeni yobukhosi ngoba efuna kungathiwa uyachema.
Siyakwamukela ukuthi ukugxekwa uma usebenza nesakhiwo esinezikhundla ezifana nobuholi bomdabu kuyindlela yokuphila kodwa masigxekwe ngeqiniso uma senze iphutha singabhecwa ngobende inyama singayidlile.