Mukhulu umsebenzi owenziwa wothisha esizweni sakithi
MHLELI: Umhla ka-5 Okthoba wusuku lothisha olugujwa emhlabeni wonke.
Uma sikhuluma ngothisha sikhuluma ngabantu abenza umsebenzi owenziwa nguJesu Kristu owayefundisa abantu yingakho wayenabafundi abaqhubeka nomsebenzi wakhe noma engasekho Yena.
Namuhla ngithi othisha abahlale phansi babheke imisebenzi yabo emihle yokukhanyisela isizwe asebeyenzile. Yebo akukho soka elingenasici kodwa kufanele isizwe sibaxhase kunokubagxeka ngoba kulezi zinsuku sebekwenza konke. Bangabahlengikazi, osonhlalakahle, abeluleki bezengqondo baphinde babe ngabaxazululi bezinkinga nabehluleli konke lokhu bakwenza ngale kwenkokhelo.
Ziningi izinto ezikhathazayo kulo msebenzi wobuthishela ikakhulukazi ukuphepha kodwa noma kunjalo zinsizwa nezintombi zase-Afrika qhubekani nokufundisa isizwe umvuzo wenu niyowuthola ngale. Asebadlula, ababenza umsebenzi owubizo kubona, mabalale ngoxolo.
Kukhona umoyana esiwuzwayo othi amaholidi ezikole azoncishiswa ngoba maningi kakhulu. Mhlawumbe kusafanele bawubhekisise kahle umsebenzi wobuthisha ngoba ukhathaza ingqondo. Ulele uyacabanga ukuthi kumele wenze njani ngaloya naloya mfundi onenkinga. Makhosi Ndokweni E-EASTWOOD
Ngiwubona uxova izindlu umnyango wakwaCogta.
Ezikhathini eziningi uMnyango wakwaCogta uma ugxekwa ngento ongayenzanga sivamise ukuthula. Lokhu kusuke kungekona ngoba singakwazi ukuziphendulela. Ngenxa yokwazi nokuqonda ukuthi umsebenzi uhulumeni waKwaZulu-Natal awuthume umnyango yilowo wokuthuthukisa nokubuyisa isithunzi sesakhiwo sobuholi bomdabu esadicilelwa phansi yimibuso yaphambilini, siyaye singafisi ukuphawula esidlangalaleni ngezindaba ezithinta isakhiwo sethu esihloniphekile sobukhosi.
Kuyilungelo likaMbovu lokusola umnyango ngokuxova kodwa akavumelekile ukuhlanekezela iqiniso. Kungamampunge ukuthi umnyango kunabantu obaphoqayo ukuba baphathwe yinkosi. Udaba lobukhosi lusingathwa wumndeni wenkosi. Yiwo othatha izinqumo ngofanele ukuba sesihlalweni sobukhosi ulandela ulibo lomndeni. Umsebenzi womnyango wukugcina ezinqolobaneni zawo ulibo lomndeni nokuqinisekisa ukuthi okweziwayo kulandele imigomo nomthetho.
Ngaphezu kwalokho kuhlale