Asizimisele ngokunaka izimbangi - oweBucs
UNOZINTI we-Orlando Pirates, uSiyabonga Mpontshane, uthi abafuni ukuzicindeza ngokuqalaza izimbangi zabo ukuthi zenza kanjani, bafuna ukuqinisekisa ukuthi baqoqa amaphuzu kusakhanya.
I-Pirates izotholana phezulu naMaZulu FC kusasa emdlalweni we-Absa Premiership eKing Zwelithini Stadium, eMlaza, ngo-8 ebusuku. Ziya kulo mdlalo nje, womabili la maqembu adlale ngokulingana maphakathi nesonto. EZimnyama zidlale ngokulingana neLamontville Golden Arrows emdlalweni ophele ngo 0-0, kwathi Usuthu lwabambana nomkhaya iMaritzburg United ngomphumela ofanayo.
Sekwejwayelekile ukuthi iMamelodi Sundowns ingayiqali kahle isizini kodwa kuthi uma isiphakathi ingabe isabambeka, okuphetha ngokuthi inqobe isicoco seligi. Sekuphele imidlalo ewu-19 amaBrazilians engasazi isibhaxu kwi-Absa Premiership (sekuphele izinsuku eziwu-264 yagcina ukushaywa).
Ngakolunye uhlangothi iKaizer Chiefs ibonakala isefomini muva nje, okufakazelwe ukuthi umqeqeshi uGiovanni Solinas, nesithenjwa uKhama Billiat bakhale bemuke nemiklomelo yomqeqeshi, nomdlali wenyanga kwi-Absa Premiership izolo.
UMpontshane utshele Isolezwe ukuthi abafuni ukubheka izimbangi zabo ukuthi zidlala kanjani, okwabo ukuthi baqoqe amaphuzu.
“Asifuni ukubheka iChiefs neSundowns, thina sifuna ukuqoqa amaphuzu kusakhanya. Siyazi ukuthi sizobhekana naMaZulu afuna amaphuzu ngokushesha. Siyazi futhi ukuthi adlala ibhola elingaqondakali ngakho kunzima ukuwahlelela. Okwethu nje, ukuya enkundleni sizame ngakho konke okusemandleni ukuthi sithole amaphuzu amathathu,” kusho uMpontshane.
Eqhubeka echaza uMpontshane uthe maphakathi nesonto balahle amaphuzu amabili bedlala ne-Arrows, wathi ngeke baphinde iphutha elifanayo kwelinye futhi iqembu laseThekwini.
“Akwehlanga kahle ukulahla amaphuzu amabili sibhekene ne-Arrows. Uma iqembu elikhulu njengePirates lilahla amaphuzu ingcindezi iyaqonga kithina njengabadlali. Sifuna kuphele isizini kukhona esikunqobile ngoba iBucs iyiqembu elikhulu kakhulu ukuthi kungaphela isizini sishwiba izandla,” kuphetha uMpontshane.
Injini yoSuthu uMichael Morton ithe nakuba yazi ukuthi umdlalo wabo neBucs uzoba nzima, kepha isimo abazithola bekusona sisho ukuthi kufanele baqoqe amaphuzu. Usuthu lunamaphuzu amabili vo, emidlalweni eyisikhombisa ngemuva kokujeziswa yiFifa.
“Siyazi ukuthi sisendaweni embi kodwa singabadlali siyakuqonda okufanele sikwenze. Yebo, sibhekene neqembu elikhulu kodwa iqiniso wukuthi nathi sidinga amaphuzu, ngakho siya kulo mdlalo sifuna amaphuzu aphelele,” kusho uMorton.
Imidlalo ye-Absa Premiership:
Namuhla: Maritzburg United v Cape Town City (Harry Gwala Stadium, 8pm)
Kusasa: Free State Stars v Bloemfontein Celtic (Goble Park Stadium, 3.30pm); Kaizer Chiefs v Polokwane City (Moses Mabhida Stadium, 6pm); AmaZulu v Orlando Pirates (King Zwelithini Stadium, 8.15pm); Highlands Park v Chippa United (Makhulong Stadium, 8.15pm)
NgeSonto ngo3.30 ntambama: Lamontville Golden Arrows v Black Leopards (Princess Magogo Stadium); Mamelodi Sundowns v Bidvest Wits (Lucas Moripe Stadium); Baroka FC v SuperSport United