‘Ngeke sifune ukuphindisela kwiCitizens’
UFADLU Davids opheka iMaritzburg United ulindele ukuthi zithengane ezakhe neCape Town City ezobavakashela namuhla eHarry Gwala Stadium emdlalweni we-Absa Premiership ngo-8 ebusuku.
I-United ibuye nephuzu ivakashele AmaZulu FC eKing Zwelithini Stadium ngoLwesibili ebusuku umdlalo uphela ngo 0-0.
ICity abazodlala nayo izofika kubona ibuya endukwini ka 2-0 eyithole kwiBidvest Wits eKapa ngoLwesibili. I-The Citizens ishaywe ibuya ekubhiyozeleni ukunqoba isicoco seMTN 8 ngempelasonto edlule.
La maqembu aseke ahlangana kule sizini iCity yawashisa iTeam of Choice ijezi kuma-quarterfinal eMTN 8 ngo 1-0.
UDavids uthe bazobe bengayicabangi eyokuziphindiselela uma sebeya emdlalweni.
“Ngeke sicabange ukuziphindiselela. Basishaya kufanele kowomkhumulajezi. Sasisazama ukuhlangana futhi kubafanele ukunqoba indebe. Kodwa manje sesingcono ngakho ngilindele umdlalo ovulelekile. Iqembu okuyilona elizokwenza kahle osukwini yilona elizowuthatha umdlalo,” kusho uDavids.
I-Maritzburg ayiyiqalanga kahle isizini njengoba bekulindelekile uma kubhekwa ukuthi ngesizini edlule iqede endaweni yesine kwi-log.
Isanqobe umdlalo owodwa kweyisithupha.
UDavids uthe ufuna bakhele ephuzwini abalitholile emdlalweni waMaZulu.
“Ngicabanga ukuthi ukwabelana ngephuzu yiwona umphumela okahle kuwona womabili amaqembu ngoba ngokwamathuba bekunganqoba noma yiliphi. Ngakho sizolamukela iphuzu lasekuhambeni. Okuhle engikuthatha kulo mdlalo wukuthi lona owesine singangenelwa yigoli. Kodwa kusamele senze kangcono kakhulu uma sihlasela, siliphase kangcono nangobunono ibhola uma sisebhokisini nezinqumo esizithatha khona,” kusho uDavids.
Uthe ngokubona kwakhe iCity isiyiqembu elidlala ibhola elingcono njengoba sekungunyaka wesibili iholwa nguBenni McCarthy.