‘Kuzoba nzima singenabalandeli’
UKUFANISE nokuba semngcwabeni ukudlala ngaphandle kwabalandeli umqeqeshi weKaizer Chiefs, uGiovanni Solinas, ezakhe ezizobhekana nePolokwane City ngempelasonto zibukwa izihlalo eMoses Mabhida Stadium, eThekwini.
Lo mdlalo we-Absa Premiership ungo-6 ntambama. IChiefs izobe iqala isigwebo semidlalo emibili ingabukwa muntu. Ijeziselwa isenzo sabalandeli bayo abangena balimaza le nkundla yaseThekwini, impahla yokusakaza nonogaga, iqembu liwashiswa ijezi kuma-semi final eNedbank Cup ngesizini edlule.
“Kuzoba umdlalo onzima kithina singenabalandeli. Ngokwami ibhola liyilo ngabalandeli. Ukudlala ngaphandle kwabalandeli kufana nomngcwabo ngoba yibona abenza ube muhle unobhutshuzwayo benikeza abadlali umdlandla. Ngicabanga ukuthi lesi akusisona isimo esihle kithina. KwiCape Town City bekunabantu abawu-30 000 abebezosibuka kuzoba nzima ukudlala ngaphandle kwala bantu.
“Kodwa-ke ngeke sicashe ngalokho kuzomele silwele ukuwunqobela abalandeli bethu umdlalo,” kusho uSolinas.
Lo mqeqeshi odabuka e-Italy ubekhuluma nabezindaba izolo ngemuva kokuthi yena nomdlali wezakhe, uKhama Billiat, behlabane ngemiklomelo yePremier Soccer League (PSL) kukhethwa abenze kahle emidlalweni ye-Absa Premiership ngenyanga edlule.
USolinas ube ngumqeqeshi ovelele, uBilliat wahamba nomklomelo womdlali ovelele. IChiefs iqale imidlalo ngoSepthemba ngokuqumba phansi iCity ngo 4-1 inqoba okokuqala emidlalweni yeligi. Ilandelise ngokushaya iFree State Stars ngo 2-0 yase ithela phansi AmaZulu FC ngo 2-0.
“Ngibonga iNkosi ngokungalimali. Ngibonga nethimba labaqeqeshi nozakwethu njengoba lo mklomelo ungekho ngami. Sonke senze kahle yize sisekhona isikhala sokuthi sibhukule ukuze sizuze esizibekele khona futhi ngicabanga ukuthi sisahamba kahle. Ngiyajabula ukwamukelela ozakwethu lo mklomelo,” kusho uBilliat.
USolinas osekusho kaningi ukuthi ubona lo mdlali odabuka eZimbabwe njengophambili kuleli, uqhubekile nokumncoma. Uthe lokhu akushoyo akusikhona ukubukela phansi abanye abadlali kodwa kungumbono wakhe.
UBilliat uthe ukunconywa umqeqeshi aze amkhothamele akumenzi azibone ehlukile ngoba “uyakwenza kuwona wonke umuntu ejimini”.
“Ngiyabonga ukuthi uyangithanda nami ngiyamthanda. Ngiyabuthanda ubudlelwano esinabo naye.”
USolinas uthe uBilliat ufanelwe ukudlala phesheya kwezilwandle.
“Yebo bonke abadlali bayaphupha ngokudlala e-Europe kodwa akusibona bonke abangadlala khona,” kusho uSolinas.
Lokhu kungemuva kokuthi uBilliat ethe njengaye wonke umdlali uyasifa ukuwelela phesheya.
“Isifiso sawo wonke umdlali ukudlala phesheya. Lokho kuyenzeka uma wenza kahle. Ngicabanga ukuthi angikenzi kahle okwami wukuthi ngiqhubeke nokusebenza kanzima, ngilinde. Kuzokwenzeka ngesikhathi esifanele,” kusho Billiat okuke kwabikwa ukuthi uzanyelwa iqembu phesheya ngaphambi kokusayina neChiefs.
LFAKhonamanjalo usihlalo weChiefs uKaizer Motaung unxuse abalandeli ukuthi bsihloniphe isigwebo esinikwe iqembu, bangayi enkundleni ngoba lokho kungasusa uthuthuva. Unxuse ukuba babuke umdlalo kwithelevishini ngoba uzovezwa bukhoma.