Uma imoto ikekela ungahambi ngayo
SIYABINGELELA kubalandeli bale ngosi enhla nasezansi. Size ngodaba oluhle lokucindezela amahazard bese sikhwebukela eceleni komgwaqo lapho kuphephe khona ngethemba lokuthi sonke siwelele ngempumelelo kule nyanga yezokuthutha u-Okthoba. Masithi gozololo siququde le mpande yangemihla singayeki ukushaya amahazard.
Namhlanje sisukuma nesimo esingethuse ngacishe ngayeka isiteringi ngabamba ikhanda imoto ihamba ngithubeleza ngomgwaqo osuka eXobho ngibheke ngaseRichmond. Lana ngilandela ibhasi emgwaqweni omazombezombe kodwa ngisho umgwaqo usuqondile leli bhasi ngilibona lonke uhlangothi lwalo lwangakwesokunxele. Kafushane nje liyakekela lokhu okubabazisayo. Ngeke nokho ngilidalule ukuthi leli bhasi belithwele abantu abasukaphi beyaphi nokuthi elayiphi inkampani kodwa konke lokho ngiyakwazi.
Ucwaningo lwama-hazard luthola ukuthi lo mkhuba wande ezimotweni ezinkulu namaveni yize kwenzeka nasemotweni ezincane.
Okufike kube yinto ejwayelekile kuzo zonke izimoto ezinale nkinga ukuthi kuba yizimoto ezidonsa ngamasondo angemumva kanti futhi ziba nezipringi ezingamapuleti amise okukacelemba wokuhesha utshani lona obizwa nge hubhane noma ubhushu kwezinye izindawo.
Lezi zipringi ezitakene ziboshwa zihlanganiswe no-diff nge-U bolt. Ukuze u-diff uhlale uzinze endaweni eyodwa kuba khona iqhuzwana lensimbi noma ibhawodi elibizwa ngeCenter Bolt. Ngenxa yokunyakaza kwemoto kuyenzeka lolu phonjwana lwensimbi ludleke lugundeke bese uma imoto idonsa, ngenxa yokuthi amasondo awadonsi kanye kanye kukhona uhlangothi olusheshayo olunamandla kunolunye, bese u-diff uyanyentuka iqale ikekele. Lolu hlobo lwezipring lubambelela ku shesi wemoto ngama bush akhiwe yinsimbi ne rabha.
Kungenzeka ukuthi umshayeli angayiboni le nkinga kodwa abanye abasebenzisi bomgwaqo bayayibona uma beyilandela imoto noma bezohlangana nayo. Umphumela wale nkinga kuba ukufa kwamajoyinti abizwa nge-universal joints kushafu ngenxa yokuthi asehlala engaqondene kahle no-gear box.
Okunye okungaba yimbangela yalesi sifo ukugoba kohlaka olubizwa ngo chassis okuvame ukusukela engozini eke yehlela imoto. Kubalulekile ukuthi imoto eke yagingqika noma yashayisa kakhudlwana ihlolwe ukuthi ushesi wayo usaqondile yini.
Lokho kwenziwa abacangcathi bezimoto kangcono yize nabalungisi bamasondo (wheel alignment) bekwazi ukukubona bakulungise kodwa uma kungukuthi kugobe ushesi, kubiza abacangcathi.
Imoto enale nkinga ingaba nokungazinzi emgwaqweni ikakhulukazi uma ithatha ijika lapho ingawebezela ingazimeleleli ngendlela efanayo uma ijikela esikudleni noma ibamba ijika eliya ngakwesobunxele kuncika ekutheni iklunyuke ngaphi. Nendlela edla ngayo amasondo ngeke ifane uma isihamba lugugumbe. Ukukekela kwemoto kuvamise ukudalwa yisimo esiba semasondweni angemumva hhayi angaphambili.
Iseluleko sama-hazard sithi uma usutholile ukuthi imoto yakho iyakekela ungaqhubeki nokuhamba ngayo kodwa ihambise kubeluli bazo izimoto bayelule baphinde baqondanise zonke izinto ukuze ingadali ingozi.
Hhayi-ke sesingawavala lana ama-hazard ethu siqhubeke nokushayela ngokucophelela ukuze sihlangane sisaphephile nangesonto elizayo kuyo le ngosi yezezimoto kwelakho lodumo lokuwela umfula ugcwele.
Uma kungenjalo ungasithinta ekhasini lethu Igedlela lami with Sthembiso Shangase kuFacebook. Yimi owenu nali ikheli ngezansi hazardiso@gmail. com