Umthelela womculo ekushayeleni
UCWANINGO luveza ukuthi ezinye izinhlobo zomculo zinomthelela endleleni abashayeli abenza ngayo emgwaqeni. Kuvela ukuthi izingoma ezishaya ngesigqi esipholile esingamabhithi aphakathi kuka60 no-80 ngomzuzu (beats per minute (bpm)) zikahle.
Inhloko yakwaDialdirect, uMaanda Tshifularo, ithe ngaphandle kokuphazanyiswa ukubheka izingoma kodwa umculo owulalelayo ungaba nomthelela ekutheni uzizwa kanjani nokungathinta indlela oshayela ngayo.
“Uma umculo unamandla futhi ukhalela phezulu, maningi amathuba okuthi ugijime noma uphazamiseke,” kusho uTshifularo.
Uthe ngokocwaningo olwenziwe yi-Ear Insitute of University College London, amehlo nezindlebe kudinga ukugxila endaweni eyodwa ukuze kuzosebenza kahle. Ukuhlukanisa ukulalela kwakho phakathi kokulalela umsakazo nokubheka isiminyaminya emgwaqweni kunyusa amathuba okuthi ube sengozini.
Ucwaningo lwaseMemorial University of Newfoundland, Canada lona luthole ukuthi umculo unganciphisa ingcindezi kumuntu nokucasuka ezimeni ezifana nesiminyaminya kodwa futhi zinganciphisa ulwazi lokuchusha uvike ezinye izimoto. Luphethe ngokuthi umculo okhalela phansi ukahle ngoba okhalela phezulu ungaba yisiphazamiso.
Ithimba labacwaningi eliholwa nguDkt Simone Moore oyi-psychologist yaseLondon Metropolitan University, luthole ukuthi umculo osheshayo nonomsindo wenza ukuthi inhliziyo ishaye ngamandla bese kwenza umshayeli ajabule agxile kuwo kunokugxila emgwaqweni.
UTshifularo uthe izingoma ezifana nekaTaylor Swift ethi Style eshaya ngo-96 bpm, ekaBeyonce ethi Halo eshaya ngo-90 bpm nekaEd Sheeran ethi Perfect eshaya ngo-64 bpm zikahle.
Ucwaningo luphinde lwaveza ukuthi ukulalela umculo ongawuthandi kungakwenza ube nengcindezi.
IDialdirect ikhiphe nanka amathiphu angasiza abashayeli:
- Gcina amehlo akho esemgwaqweni ngaso sonke isikhati. Uma uchitha imizuzwana emithathu uhlela umsakazo noma ubheka izingoma ungayela ngo-100km/h kwenza ukuthi uhame ibanga elingangenkundla yerugby amehlo engekho emgwaqeni.
- Gwema ukudlala umculo phezulu ngoba lokho kwenza ungakwazi ukugxila emgwaqweni futhi kukuvimba ukuthi uzwe izinto ezenzeka emgwaqweni.
- Khetha izingoma ozithandayo noma uvule umsakazo odlala umculo owuthandayo ukuze uzokhululeka.
- Gwema ukushayela uma ucasukile futhi ukhumbule ukuthi umgwaqo akusiyona indawo yokulungisa izinkinga
- Uma unengcindezi yasemsebenzini noma ucasulwa yisiminyaminya, bheka umculo owuthandayo
- Uma ukhathele ungawudlali umculo opholile kakhulu oshaya ngesigqi esingaphansi kuka-60 bpm. Uma unomndlandla ungawudlali umculo osheshayo ushayela
UTshifularo uphethe ngokuthi umculo ongakusiza ukuthi unganaki ukuthi usesiminyaminyeni kodwa uma uzithola inhliziyo ishaya ngamandla futhi unyathela kakhulu amafutha, kumele wehlise.