Kusolwa imigodi ngengozi yetekisi
KUSOLWA ukulayisha ngokweqile nemigodi esemgwaqweni omkhulu waseNquthu obheke eBabanango naseNkandla ngengozi yetekisi ebilayishe izinsizwa zengoma ebeziyosina eNkandla, okushone kuyo ababili kwalimala abangu 15, ngoMgqibelo.
Iphoyisa lomgwaqo elingavumelekile ukukhuluma nabezindaba elifikile endaweni yesehlo lithe lisola ukuthi ingozi idalwe ukulayisha ngokweqile njengoba itekisi ibilayishe abantu abangu-17. Lithe lisola nokuthi umshayeli uphazanyiswe yimigodi ephakathi nomgwaqo.
Le moto kusolakala ukuthi isuke eGoli ebusuku ngoLwesihlanu yehlelwa ingozi ngezithuba zehora lesikhombisa ekuseni isidlule ngisho edolobheni eNquthu.
Okhulumela amaphoyisa omgwaqo kwaRTI, uNksz Zinhle Mngomezulu uthe babili abashone engozini abanye balimala kanti kusaphenywa ngayo.
Okhulumela uMnyango wezokuThutha KwaZulu-Natal, uMnuz Mluleki Mtungwa uthe bazwile ngale ngozi kodwa basazama ukuthola imininingwane egcwele mayelana nabathintekayo nabashonile. “Itekisi eyehlelwe yingozi ibisuka eGoli ibheke eNkandla kodwa esikutholayo wukuthi ibilayishe ngokweqile. Kushone ababili kwalimala abangu-15. Kuzothi ngoMsombuluko sithume izisebenzi zomnyango ukuba zisitholele imininingwane egcwele ngoba ulwazi esisenalo kuseyilo lolu nanokuthi kuvulwe amacala okubulala ngokungenhloso njengoba kunababili abagcine beshonile,” kusho uMtungwa.
Omunye umshayeli ozibonele le ngozi ongathandanga ukudalulwa uthe le ngozi ibinyantisa njengoba abebesetekisini bebelimele kakhulu.
Okhulumela uMasipala waseNkandla, uMnuz Mgcobeni Khanyile uthe bazwile ngale ngozi kodwa abakabi naso isiqiniseko sokuthi laba bantu bebeya kuphi neNkandla.
“Sisazoke sibheke ngoba ngokwazi kwethu ayikho ingoma ebihlelwe wumasipala noma ebiyaziwa wumkhandlu ebizokwenzeka ngoMqgibelo, eNkandla. Nokho sizozama ukuthola imininingwane ukuze sithole ukuthi ngabe bekungabantu balapha eNkandla yini,” kusho uKhanyile.
Isolezwe lithole ukuthi le ndawo okuginqqike kuyo itekisi isivamile ukuba nezingozi ngenxa yemigodi engavalwa.
NgoJanuwari kuthiwa kwashona othisha ababeya emsebenzini ngesikhathi iToyota Fortuner igingqika.
Kuthiwa kuke kwaba nenye lapho kwashona khona umndeni.