I-ICC ihamba phambili ngezingqungquthela
ITHEKU libe wundabuzekwayo ngesikhathi limuka nezindondo ezine emcimbini obizwa ngeWorld Travel Awards obuseNkosi Albert Luthuli International Convention Centre (ICC) ngoMgqibelo.
I-ICC ithole indondo yokuba yindawo ehamba phambili yemihlangano nezingqungquthela e-Afrika obekuyisikhawu sika-17 iyithola.
Bekuvota abantu basemazweni angaphezu kuka-200 emunxeni wesikhungo esihamba phambili ezingqungqutheleni nemihlangano.
Umklomelo wase-ICC wamukelwe yiMeya yeTheku, uNkk Zandile Gumede, othe ukuwina kwe-ICC kuwubufakazi bokuthi kusetshenzwa kanzima kuMasipala weTheku.
“Ngithanda ukubonga isikhulu esiphezulu sase-ICC nethimba laso uNkk Lindiwe Rakharebe. Kuyacaca ukuthi izikhungo zethu ziphethwe ngabaholi abanezinhlelo zokuthuthukisa idolobha lethu. Ukube akuwona umsebenzi wakhe onzima wokuqinisekisa ukuthi iTheku liyaziwa emkhakheni wezokuvakasha ngabe asiphumelelanga. Sizosebenza kanzima ukuqinisekisa ukuthi i-ICC iba yisikhungo esingaconsi phansi emhlabeni jikelele,” kusho uNkk Gumede.
UNkk Rakharebe uthe uzoqhubeka nokuqinisekisa ukuthi abantu abafuna ukuba nemihlangano nezingqungquthela bakhetha i-ICC uma beza e-Afrika.
“Ngithanda ukubonga amakhasimende ethu nazo zonke izinhlaka esisebenzisana nazo. Siyabonga kuMasipala weTheku ngokusiseka kwawo,” kusho uNkk Rakharebe.
ITheku liphinde lawina umklomelo wendawo ethandwa yizivakashi i-Africa’s Leading City Destination 2018, ichweba lawina umklomelo weAfrica’s Leading Cruise Port 2018.
UNgqongqoshe wezokuThuthukiswa koMnotho, ezokuVakasha neMvelo KwaZuluNatal, uMnuz Sihle Zikalala, uthe le miklomelo ikhombisa ngokusobala ukuthi lesi sifundazwe sihamba phambili ekwenzeni imihlangano nezingqungquthela.