IPrasa ishwelezela imvume yayo kwiRSR
INKAMPANI ebhekele ukusebenza kwezitimela eNingizimu Afrika, iPassenger Rail Agency South Africa (Prasa), izobuyela enkantolo ngoLwesine emuva kokuthi ihambise iRail Safety Regulator (RSR) ebifuna ukuhoxisa imvume yokusebenza kwayo.
I-RSR ibhalele isikhulu esiphezulu sakwaPrasa, uMnuz Sibusiso Sithole, incwadi ngoMgqibelo ebimnika amahora amabili okuthi eze nezizathu zokuthi kungani iPrasa ingafanelwe ukuphucwa imvume yayo yokusebenza.
Incwadi ibhalwe emuva kokushayisana kwezitimela ngoLwesine eduze kwesiteshi iVan Riebeeck esiseKempton Park, eGauteng.
Esitatimendeni esithunyelwe kwabezindaba abakwaPrasa bathe bayakuqonda ukuthi iRSR inelungelo lokuphuca izinhlangano izimvume zokusebenza uma ikhathazeke ngokuthile.
“Izolo kube nomhlangano nezikhulu zeRSR nebhodi lePrasa kodwa akuzange kube nesisombululo. Lokhu kuphoqe iPrasa ukuthi iye enkantolo ukuze izitimela zizoqhubeka nokusebenza. Inkantolo izolalela udaba lwethu ngoLwesine okusho ukuthi sizoba nesikhathi esanele sokuphendula iRSR,” kusho uSithole.
Uthe bayicelile iRSR ukuthi igxile engozini eyenzeke eKempton Park kunokuphuca abasePrasa imvume yokusebenza ezweni jikelele.
“IRSR ibifuna ukusimisa ezweni jikelele kodwa manje ngeke kusenzeka lokho. Sicela ukuxolisa kubagibela ngokudideka okuke kwaba khona uma bezwa ukuthi imvume yethu yokusebenza ingase ihoxiswe. Siyabaqinisekisa ukuthi izitimela ezihamba amabanga amade namafushane zizosebenza njengokujwayelekile ngoba sinayo imvume yokusebenza. Sizoqoqa yonke imininingwane edingwa yiRSR futhi ukuphepha kwabagibela kuseqhulwini lwezinhlelo zethu,” kusho uSithole.
Uthe ezinye izingozi zidalwa wukucekelwa phansi kwengqalasizinda yezitimela nokuntshontshwa kwezinsiza kusebenza zesimanje athe kuholela ekulimaleni kwabagibeli nabasebenzi bakwaPrasa.