Ubehlulwa wukuma owemoto yengozi edlule nomphefumulo
KUSOLWA ukuthi umshayeli ubeqise ezinkambeni edala ingozi yemoto okushone kuyo umuntu kwalimala abathathu eVerulam.
Kuthiwa kushone imgibeli (33) obehamba nomshayeli okusolakala ukuthi ubephuza uphuzo oludakayo ngesikhathi imoto yakhe itholana phezulu nenye imoto kuR102 eVerulam ngoLwesihlanu ngemuva kwehora lesithupha.
Okhulumela abezimo eziphuthumayo, iReaction Unit South Africa (Rusa), uMnuz Prem Balram uthe abezimo eziphuthumayo bathintwe abashayeli bezimoto ebezidlula bebabikela ngengozi.
Uthe bafice abantu ababili abebehamba nge-Opel Corsa okutholakale ukuthi beqisile ezinkambini zikaFaro. Baphinde bathola namabhodlela otshwala ngaphakathi emotweni. Le moto kuthiwa itholane phezulu neveni yomsebenzi yenye inkampani yonogada eyiChev Utility.
“Ngaphakathi emotweni bekukhona amabhodlela otshwala. Nomshayeli wemoto ukuqinisekisile ukuthi ubephuze amakhothi amathathu kabhiya,” kusho abeRusa.
Umgibeli obehamba nalo mshayeli kuthiwa ushonele esibhedlela Osindisweni kwathi umshayeli nalaba abebehamba ngenye imoto balimala.
Kuthiwa umshayeli wemoto ubewa phansi ngesikhathi ephuma emotweni kanti umgibeli ophethe ngokushona ubevele esesimeni esibucayi waze ladinga ukukhishwa abezimo eziphuthumayo emotweni.
Kuvela ukuthi iveni leChev Utility belihamba liya ngasoThongathi ngesikhathi umshayeli we-Opel Corsa obebheke kwenye indlela ezama ukujikela komunye umgwaqo okukholakala ukuthi uhambe irobhothi lingakamvumeli ukuthi ahambe.
UBalram uxwayise abantu ukuthi bangakuvumeli ukugibela izimoto zabantu abashayela bephuzile. Uthe ezigamekweni ezimbili abasanda kubizelwa kuzona abagibeli abashonile abashayeli baphila. Uqhube wathi bavame ukuhambela izingozi ezinhlanu kuya kweziyisithupha ngosuku – cishe kuhhafu walezo zingozi kusuke kunabashayeli abasuke beqisile ezinkambeni.
Okhulumela amaphoyisa uCol Thembeka Mbele ukuqinisekisile ukuthi amaphoyisa asevule icala lokubulala ngokungenhloso emuva kokushona kwalo mgibeli.