Sekulula kubafundi abafaka izicelo ezikhungweni
KUZOBA lula kubafundi baKwaZulu-Natal abafuna ukuyofunda ezikhungweni zemfundo ephakeme ezingaphandle kwesifundazwe njengoba sebezofaka isicelo esisodwa esizoya kuzona zonke izikhungo abafuna ukufunda kuzo bafake nesicelo soxhaso.
Lokhu kulandela umkhankaso owaziwa ngeKaizen Applications ovumela umfundi ukufaka izicelo ezikhungweni zangaphandle kwalesi sifundazwe.
Okwamanje ihhovisi okufakwa kulona izicelo zokufunda, iCentral Applications Office (CAO), ligxile ezikhungweni zesifundazwe kuphela.
Umfundi kudingeka ukuthi azifakele izicelo ngqo ezikhungweni zemfundo ezingaphandle kwesifundazwe ekubeni ukhokha imali ngokufaka izicelo isikhungweni ngasinye.
UMnuz Sahluko Sithole, ongomunye wabasunguli beKaizen Applications, uthe njengoba bebaningi abafundi ababhala u-matric zincane izikhala ezikhona ezikhungweni zemfundo.
Uthe nyakenye kwabhala abangu-194 000 kodwa izikhala zokufunda emanyuvesi zazingu-45 000.
“IKaizen Applications egunyazwe uhulumeni isiza umfundi ukufaka isicelo esisodwa, asho izikhungo ezine afuna ukufunda kuzona. Sibe sesimfakela izicelo kwezinye izikhungo ezine, ukuze kungabi nesimo lapho umfundi engasatholi khona isikhala sokufunda,” kusho uSithole ongeze ngokuthi basanda kuthula ihhovisi eKZN.
Uthe umfundi ufaka isicelo sokufunda kunoma iyiphi inyuvesi futhi kuba lula ukubona ukuthi isicelo sakhe sesikuphi.
“Kwifomu kuba khona nendawo lapho efaka khona ukuthi uyaludinga yini uxhaso lwezimali kwaNSFAS (National Students’ Financial Aid Scheme) nendawo yokuhlala. Kubuya izimpendulo ezikhungweni ezehlukene ngoba ufaka izicelo ezikhungweni ezingu-8,” kusho uSithole.
Uthe basebenzisana nenhlangano eqinisekisa iziqu iSouth African Qualifications Authority (SAQA).
Uthe nguR420 ukufakelwa isicelo sokufunda okwenza kwiwebsite uma ufake isicelo kwiCAO kodwa uma ungasifakanga kwiCAO nguR620.
USithole uthe kubiza ngaphezulu kukaR100 ukufaka isicelo sokufunda enyuvesi ngayinye.
UMnuz Sabelo Gumede, ongomunye wabasunguli beKaizen Applications, uthe okunye abasiza ngakho abafundi yincazelo ngemikhakha abangayenza ezikhungweni zemfundo.
Uthe basebenzisana nezikole lapho behamba nabantu abasebenza kuleyo mikhakha beyochazela abafundi ngayo.
“Sigxile kubafundi abenza uGrade 9 abangakayikhethi imikhakha abazoyenza njengoba beqala ukukhetha izifundo kwaGrade 10. Kwa-matric nabo siyabaluleka ngemikhakha abangayenza ikakhulu sibayalele ngaleyo edingeka kakhulu ezweni,” kusho uGumede.
USithole uthe abafaka izicelo abaye kwi-website ethi:www. kaizenapplications-sa.co.za. Uthe banamahhovisi eThekwini, eGoli nase-Eastern Cape.