Okulindelekile emuva kwesinqumo ngensangu kuleli
KUBALULEKILE ukucacisa ngesinqumo esikhishwe yiNkantolo yoMthethosisekelo sokuvumela ukusebetshenziswa komthunzi wezinkukhu endaweni engasese nokutshalwa kwawo. Sizoyibeka eceleni eyemigiligoci yemithetho elandeliwe.
Asikhumbule ukuthi akuwona umsebenzi wenkantolo ukubhala umthetho ngoba lowo wumsebenzi wesiShayamthetho esinamalungu amaqembu ezepolikiti afakwe ngevoti ePhalamende.
Umsebenzi wenkantolo ngukuchaza umthetho njengoba ubhaliwe yisiShayamthetho nokuyalela isiShayamthemtho ukuthi asiwushitshe uma ungahambisani noma uphambene namalungelo akuMthethosisekelo.
Amandla unikezwe wona okuzikhethela nokwenza okuthandayo inqobo nje uma kungalimazi omunye umuntu noma amalungelo akhe.
Unelungelo nesibopho sokuzivikela wena nomndeni wakho uma usebenzisa ilungelo nokuzithathela izinqumo ngawe nabathandiweyo bakho. Okushiwo yinkantolo wukuthi uhulumeni akakwazi ukunqunda ilungelo, kufanele akunike amandla okuzikhethela othanda ukukwenza inqobo nje uma kungalimazi ilungelo lomunye.
Uhulumeni useke wakwenza lokhu phambilini ngokuvumela izidakamizwa ezifana nophuzo oludakayo nogwayi. Kuphinde kube khona amaphilisi uhulumeni avumele ukuthi asetshenziswe angagcina umsebenzisi wawo esengakwazi ukuhlala ngaphandle kwawo ngenxa yokubambeka kuwona.
Okufanele kuqikelelwe nguhulumeni wukuthi kube khona ulwazi oluphelele ngaleso sidakamizwa ukuze ukwazi ukuthatha isinqumo esiqukethe ulwazi ngokufaka emzimbeni wakho.
Izindlela okusetshenziswa ngazo umthunzi wezinkukhu: Zintathu
izindlela ezethulelwe inkantolo zokusetshenziswa komthunzi wezinkukhu.
* Ikhambi lokulapha ubuhlungu obungabekezeleleki ikakhulu kulabo abaphethwe umdlavuza
* Abawusebenzisa ngokwenkolo esondelenene nemvelo okuyinkolo iRastafari * Ukuzijabulisa Inkantolo ivumile ukuthi ayibona ongoti ngokwezempilo yingakho ithathe ubufakazi bodokotela ukuthi insangu ibuye isize lapho imithi isihluleka khona.
Sizokhumbula ukuthi nelungu le-IFP eseladlula emhlabeni uMnuz Mario Oriani-Ambrosini lake laphusha ukuthi akuvunyelwe ukusebenziswa kwensangu njengekhambi.
Inkolo ibalulekile nezimiso ezibizwa yileyo nkolo nazo zibalulekile, yingakho nabenkolo yamaRastafari kufanele bahlonishwe njengoba kwenzeka kwezinye izinkolo. Ikakhulukazi ngoba abakholelwa kuyo bangena kuyo ngokuthanda, befuna ukuphila ngaphansi kwezimo zaleyo nkolo yabo ngokusebenzisa ilungelo labo eliqinisekiwe kuMthethosisekelo.
Iphinde isetshenziswe njengendlela yokuzijabulisa, inkantolo ibheke ilungelo lokuzikhethela ngempilo yakho. Angicacise ukuthi yileli lungelo elenza kuvumeleke ukusebenzisa uphuzo oludakayo nogwayi yize kulimaza impilo. Uma ubheka lokhu akuthuthukisi impilo yakho lokhu esingathi ama-health benefits kodwa kuvumelekile, kunikezwe wena ilungelo lokuthi uzikhethele.
Kuzokwenzekani kusukela manje:
IsiShayamthemtho sinikezwe iminyaka emibili ukubhala kabusha imithetho ukuthi sivumele ukusetshenziswa kwensangu. Kule minyaka kuzoba nohlelo lokuyisa umthetho ohlongozwayo kubantu ukuthi baphawule ngawo. Umsebenzi wethu sonke wukuthi sitshele uhulumeni ukuthi ukusetshenziswa komthunzi wezinkukhu kumele kube kanjani.
Yilapho-ke la kufuneka wena nami sizwakaliswe imibono yethu ngalolu daba. Nginethemba lokuthi uhulumeni uzolwenza ocwaningo olujulile ngalolu daba ubheke nezokuhweba akulumbanise nokuvikwela abantu.
Singabona futhi imigomo efana nekagayi nophuzo oludakayo ifakwa la ukuze kuvikelwe izingane.
Okwamanje okwakho nami ukukhumbula ukuthi uvumelekile ukusebenzisa insangu, ungayitshala uma ungeke uwuyidayise kodwa uzisebenzisela wena.
Awuvumelekile ukuyidayisa noma ukuyibhema ezindaweni zomphakathi. Uma wenza okuhlukile uzoboshwa ngoba uzobe usuphule umthetho.
Ababhekene namacala aphathelene nensangu, bangathola amacala ababhekene nawo ehoxiswa kodwa akuwona wonke azohoxiswa. Mabaxhumane nabameli babo ukuze udaba lufakelwe izibuko benze nezethulo ophikweni lwezokushushisa.
UMnuz Mpumelelo Zikalala ungummeli weZikalala Attorney