Kuyiswa izidingo kwabasemijondolo
UZOTHOLA izidingo umphakathi wasemijondolo iNew City ku-ward 14, eDassenhoek eMariannhill njengoba sekuqaliwe ukufakwa kwezinombolo zezindlu kanti maduzane kuzofakwa ugesi.
Lokhu kuvezwe yikhansela lendawo uMnuz Bheki Mfeka ngesikhathi kunomkhankaso wokugqugquzela umphakathi ukuthi usizane iThuma Mina.
Kulo mkhankaso kugqugquzelwe ukuthi umphakathi uhlole izifo ezehlukene okubalwa ingculazi nofuba.
UNgqongqoshe wezeMpilo KwaZulu-Natal uDkt Sibongiseni Dhlomo uhlanganyele nomphakathi ohambeni olusuke kwaDimba lwaphelela eduzane neNew City ngaseMariannridge.
Le ward ihlanganisa izindawo ezike zaba sematheni njengeThornwood, lapho umfana ebulale unina, unina wezingane zakhe, yingane wase ezikhunga. Ezinye izindawo ezikule ndawo yiseSithundu Hills edume nge-21 nayo egajwe wubugebengu.
UMfeka uthe le ndawo yasemjondolo baqalile ukusebenza kuyona.
“Ugesi uzofakwa maduzane kanjalo namanzi. Siqalile ukungena kule ndawo njengoba ibingaphansi kukaward 15 kodwa manje isingaphansi kuka-ward 14,” kusho uMfeka.
Uthe emashini baqwashise ngobugebengu obudlangile kule ndawo njengoba isiteshi samaphoyisa iMariannhill sibe ngesinye okubikwe kusona kakhulu ubugebengu ngokwezibalo zamaphoyisa ezisanda kukhishwa.
UMfeka uthe njalo esontweni lokuqala lenyanga kumele kwenziwe okuthile njengoba ama-ward nama-zone kumele kube noThuma Mina okuwumkhankaso we-ANC.
“Izibalo zaseMpola nakwezinye izindawo zaziphezulu ngabantu abahaqwe yingculazi neTB. Yingakho kubalulekile ukuthi abantu bazivocavoce ukuze baphile impilo ende. Umphakathi ululekwe nangokudla ukudla okunomsoco,” kuqhuba uMfeka.
Uthe ukufika kukaDhlomo kwenze waba nesigqi lo mkhankaso wabonga abamatekisi athe basebenzisane kahle nabo kule mashi ebingamakhilomitha amahlanu.
UDhlomo ugqugquzele umphakathi ukuthi uzihlole udle ukudla okunomsoco.