Isiphakamiso ngemali yokhetho
KUZOBA ngumqansa emaqenjini ezepolitiki adonsa kanzima ngasezimalini njengoba kuzodingeka akhiphe uR605 000 ukuze angenele ukhetho lwangonyaka ozayo.
Amaqembu azokhipha uR200 000 wediphozithi uma engenela ukhetho kuzwelonke kuphela, ukungenela ukhetho esifundazweni ngasinye kuzoba nguR45 000.
Le mali iyabuya uma iqembu lithole izihlalo ePhalamende noma eziShayamthetho.
Lezi ngezinye zeziphakamiso ezethulwe yinhlangano eyengamele ukhetho i-Independent Electoral Commission (IEC) njengoba ikhiphe isimemezelo ifuna ukuphawula komphakathi namaqembu mayelana nale mali yokungenela ukhetho.
I-IEC ithe ukusetshenziswa kohlelo lokufaka idiphozithi ukuze ungenele ukhetho yinto eyenziwa emhlabeni jikelele.
Ithe angu-262 amaqembu abhalisiwe kuzwelonke kodwa azongenela ukhetho uma ehlangabezana nayo yonke imibandela yale nhlangano okubalwa nokukhokha le mali.
“Uma engawinanga lutho amaqembu imali iya kwiNational Revenue Fund. Angu-29 amaqembu angenela ukhetho ngo-2014, angu13 athola izihlalo ePhalamende,” kusho i-IEC.
Kuhlukene imibono emaqenjini ezepolitiki ngalesi siphakamiso se-IEC.
UMnuz Canaan Mdletshe, okhulumela umholi weNFP uNkk Zanele Magwaza-Msibi, uthe bayasamukela lesi sinyathelo ngoba sizoqeda ngabantu abathi uma becasukile bese bevula amaqembu ezepolitiki.
Uthe kuyihlaya ukuthi abalelwa ku-29 amaqembu angenele ukhetho kuleli.
“Ukube kuya ngathi besizothi awangabe esabuya amadiphozithi ukuze abantu abangenele ukhetho bangacabangi ukuthi kuyadlalwa. Amaqembu amaningi uthola ukuthi awanazo izinhlelo agijimela ukungenela ukhetho nje.”
Umholi weMazibuye African Congress, uMnuz Reggie Ngcobo, uthe yena ukholwa wukuthi ukufunwa kwamadiphozithi emaqenjini kucindezela ilungelo nentando yabantu.
“Ezweni elinobubha ikakhulukazi kwabohlanga le mali yinkulu njengoba kuyinkinga ngisho ukuqhuba umsebenzi weqembu wansuku zonke,” kusho uNgcobo.
Uthe le mali ifunelwa ukuthi kucindezelwe abohlanga ngoba kuyaziwa ukuthi imali kabanayo.
“Uzokhumbula ukuthi i-EFF ike yazama ukulufaka enkantolo lolu daba kodwa yachithwa,” kusho uNgcobo.
Umholi we-Academic Congress Union, uMntwana Mzonjani Zulu, uthe bajabule ngoba i-IEC ithe ukuyehlisa kancane imali uma kuqhathaniswa nokhetho olwedlule.
“Phambilini ukungenela isifundazwe bekuwuR50 000 njengoba manje sekuwuR45 000. Thina sesisithathile isinqumo, sizongenela izifundazwe ezintathu kuphela ngenxa yemali,” kusho uZulu.
Umholi weNational People’s Front, uMnuz Bheki Gumbi, uthe nakuba isinda le mali kodwa akangabazi ukuthi bazoyikhokha.
“Noma imali singenayo kodwa ngikholwa ngukuthi amalungu ethu azokwazi ukuhlanganisa sikwazi ukukhokha,” kusho uGumbi ngempelasonto ethula iqembu lakhe ngokumsemthethweni KwaZulu-Natal.
Umholi wePRM, uMnuz Nhlanhla Buthelezi, uthe abanankinga nendaba yemali ngoba bebeyibeka.
Uthe bazongenela ukhetho kuzwelonke nasezifundazweni ezine okuyiKZN, Eastern Cape, Gauteng neFree State.
Abafuna ukuphawula ngamadiphozithi bangathumela ku: deposits@elections.org.za noma babhalele ku:Election House, Riverside Office Park, 1303 Heuwel Avenue, Centurion bacele uMnuz Kgosietsile Tshoke.
Kuvalwa ngo-Okthoba 26 ukuphawula mayelana nemali yediphozithi.