‘Kuningi esizokulungisa ngekhefu leFifa’
UMQEQESHI weKaizer Chiefs, uGiovanni Solinas, ukhombise izimpawu zokukujabulela ukuthi imidlalo ye-Absa Premiership izoke ithi gozololo.
Kuphazamiseke irekhodi lakhe lokungashaywa emidlalweni eyisikhombisa ngesikhathi ekhala ngaphansi ngo 1-0 kwiPolokwane City.
Emdlalweni obungabukelwa muntu ngenxa yesigwebo seChiefs esithole ngenxa yokuthi abalandeli bayo besolwe ngokuhudulela phansi isithunzi seligi, iChiefs ikhale ngaphansi ngenguzunga yeshodi elishaywe uVusumuzi Mngomezulu ngasekupheleni kwesiwombe sokuqala.
Nakuba uSolinas ekhala ngokuthi bekuzoba ngcono ukuba bebewuwinile umdlalo ukuze baye ekhefini behambela phezulu kodwa uthe lizomnika ithuba lokusebenza ngezinto ezithile bese kuvela nesikhathi esikahle sokuthi alulame ngokugcwele uLeonardo Castro olimele.
“Uqalile uCastro ukugijima namuhla (esho ngoMgqibelo). Lezi yizindaba ezimnandi ngendlela engachazeki ngoba ungomunye wabadlali abamqoka kithina. Ithuba elikhona singadlali ngalo lizokwenza ukuthi asebenze kahle nodokotela bengacindezwe yilutho,” kusho uSolinas.
Ngemuva kwalo mdlalo kuzoba khona ikhefu lemidlalo yeFifa kuphinde kuqale neTelkom Knockout. Umdlalo weligi olandelayo weChiefs omkhulukazi wabakhaya baseSoweto lapho bezobe bebhekene khona ne-Orlando Pirates eFNB Stadium, eGoli.
“Kuyiqiniso ukuthi lo mdlalo uhlukile kuneminye ngoba abalandeli bathola nethuba lokuchoma kepha okumqoka kimina wukuthi senze ibe ngcono indlela esidlala ngayo. Kusemqoka ukuthi sidlale kahle bese siwugcina lowo mgqigqo. Vele kubalandeli nasemlandweni weqembu kuzoba mnandi uma sinqoba kodwa iqiniso wukuthi kuzoba amaphuzu amathathu njengakuyona yonke imidlalo.”
USolinas akayinakile indaba yokuthi uma ewaqoqa egcwele kowabakhaya waseSoweto uzobe eqala ukuwina ebhekene namaqembu athathwa njengamakhulu.
“Akuyona into engiyifake ekhanda leyo kodwa engingakusho wukuthi ayisekho le nto yokuthi kukhona amaqembu amakhulu kumbe amancane. I-Highlands Park engigxekwa ngokudlala ngokulingana nayo ifike yathatha iphuzu kwiMamelodi Sundowns nakwiPirates ngokwahlukana. Amaphuzu ayafana futhi alwelwa ngendlela efanayo. Ngilijabulele leli khefu elivelile ngoba kukhona izinto eziningi okufanele sizilungise. Kuhleke futhi ngoba kunika nabalimele ithuba lokululama ngendlela,” kuphetha uSolinas.