IWits iyagoloza ukusuka esicongweni
IMamelodi Sundowns (0) 1 Bidvest Wits (0) 1 GOLOZILE nokuhlala esicongweni iBidvest Wits ebuye ngemuva yacazelana amaphuzu neMamelodi Sundowns emdlalweni we-Absa Premiership obuyizolo ntambama, eLucas Moripe Stadium, ePitoli.
Lo mphumela uqinisekise indawo yeWits esicongweni ngephuzu elilodwa.
EzikaPitso “Jingles” Mosimane azizange ziyiqale kahle isizini. Lokhu kuncike kakhulu ekutheni abadlali abafana noGaston Sirino, Tony Silva noLebohang Maboe abakangeni khaxa egiyeni ukuthi sebengenza kube lula ukukhohlwa uKhama Billiat noPercy Tau abashiye iqembu ekuqaleni kwesizini.
Lokhu kubonakale ngomzuzu wokuqala kade kuyi-freekick ibhola lawela kuTerrence Dvukamanja olingqofele epalini kodwa lashaya ipali labuyela ensimini. NoSimon Murray uthole ithuba elithi alifane ngomzuzu ka-30 kwasebenza ukuthi uphapheme unozinti weSundowns, uDenis Onyango.
Yize iSundowns iqale umdlalo ingayazi induku kodwa umphumela wangoLwesithathu lapho icazelane khona amaphuzu neBloemfontein Celtic kufuze ukuthi awuyihleli kahle. Elangeni ebelishisa bhe, la maqembu abelokhu ethengana kodwa ithuba eliwele kuSilva ngomzuzu ka-40 bekufanele alisebenzise.
Lapha ubesethubeni ebhekene noDaren Keet kodwa wahluleka ukulivalela enethini lo mdlali uMosimane ahlale echoma ngaye ukuthi ukhulele kwiLiverpool yaseEngland.
Isiwombe sesibili sikhombise izimpawu zokulandela esokuqala ngethuba elitholwe uMurray kodwa waqoma ukushayela ipali engamakiwe uLehlohonolo Majoro. NoMaboe uthole elakhe kodwa wakha amabhilidi engaxinwe muntu. Ize yavela injabulo uHlompho Kekana enamathisela ibhola enethini ngomzuzu ka-56 ngemuva komsebenzi THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50. omuhle kaSirino.
Ngemuva kwaleli goli iSundowns ibisivuke emaqandeni ihlasela iphindelela. Ukungena kukaPhakamani Mahlambi endaweni kaSilva ngesinye sezinongo zokuvuka kweDowns. Yize bekunjalo kodwa kubhakuze eka-Onyango inethi uKeagan Ritchie ejikijela inguzunga ye-free kick edaleke ngokuthi kudlaliswe kabi uDvukamanja.
Ubuye wacwila futhi uMahlambi kwala noma uMosimane esefaka uThemba Zwane endaweni kaMaboe kodwa umdlalo waqhubeka nokuba duma ngemizuzu yo-70. Obekucaca lapha ukuthi uGavin Hunt ubechazekile ngobekwenzeka enkundleni. Ngaphandle kokukhononda kukaMosimane ayikho iminyakazo ethusayo eyenzekile.