Kukhulu okuzayo: kuxwayisa uVukusic
UTHUMELE isexwayiso esishubile kwabalandelayo kwi-Absa Premiership uJozef Vukusic opheka iPolokwane City ebuyisele iKaizer Chiefs kwamhlaba ngokuyishaya ngo 1-0 koweligi obubukwa izinyoni eMoses Mabhida Stadium, eThekwini, ngoMgqibelo.
UVukusic uzishaya isifuba ngokuthi iqembu lakhe limkhumbuza njalo ukuthi lingacoboshisa kwasani uma selihlangene ngendlela afuna ngayo. Ngale wini iPolokwane izisondeze emaqenjini afuna ukuxebuka emsileni njengoba imidlalo yeligi isicela eshumini.
Emidlalweni eyisishiyagalombili, iPolokwane isiwine emine, yashaywa kabili yase idlala ngokulingana kabili futhi. Iqiniso lapha wukuthi iPolokwane ikhombisa izimpawu zokuhluka kakhulu selokhu kufike uVukusic waseSerbia.
Uyazazi lo mqeqeshi ukuthi akakhonzile ukuvala emuva kodwa akawuvali umlomo ngendlela izitobha zakhe ezimlalela ngayo.
“Kusekukhulu okuzayo. Asikho isidingo sokunconywa ukuthi udlala ibhola elihle kodwa umphumela ukhombe okunye njengoba kwenzekile sidlala neSundowns. Ngiyaziqhenya ngomsebenzi owenziwa yizitobha zami. Konke okuhle okwenzeka kithina kulele ekutheni izitobha ziziphethe kanjani. Kuzoba nzima ukusimela uma sesihlangene ngempela ngakho kusemqoka ukuthi basiqaphele bonke esisazobhekana nabo kwiligi,” kusho uVukusic.
“Ukushaya kwethu iChiefs kuyinkomba yokuthi singaxebula noma ngubani obekwa phambi kwethu inqobo nje uma sizokholelwa thina kulokho. Ngibatshelile abadlali ngaphambi komdlalo ukuthi umphumela walo mdlalo yiwona ozosikhombisa ukuthi singafinyelela kuliphi izinga.
“Yebo sinqobile kepha asikafiki lapho singafika khona. Cabanga nje ukuthi singaba yinkinga kanjani kwiligi uma singase sifinyelele ezingeni esaziyo ukuthi singafika kulona. Okwamanje indaba isesezitobheni. Nokunqoba kwethu kwiWits (Bidvest) kube wumsebenzi wezitobha. Sizoqala sizame ukukhulisa indlela esihlasela ngayo manje. Uma sekuqala lokho kuzoshuba.”
IPolokwane iphumelele ukuqoqa amaphuzu ayisikhombisa kwiWits, Chiefs nakwiSuperSport United. Ngalokhu uVukusic uthe kulula ukudlala nala maqembu athathwa njengamakhulu.
“Yonke imidlalo izoba nzima kepha ezoba lukhuni kakhulu yile yala maqembu athathwa njengamancane. Ngeneme ngakho konke kodwa angikholwa wukuthi abafana bami bazokufaka ekhanda lokhu okuncane esesikwenzile. Kuhle ngoba bakhona abadlali okungenani abahlanu ababakhumbuza njalo laba abancane ukuthi lusekude ukhalo,” kuphetha uVukusic.