UJohnson weneme ngempi yaMaZulu
UHLEKA yedwa umqeqeshi waMaZulu FC, uCavin Johnson, ngabadlali bakhe ababize ngamaqhawe bedlala ngokulingana ne-Orlando Pirates emdlalweni we-Absa Premiership eKing Zwelithini Stadium, eMlaza, ngoMgqibelo ebusuku.
USuthu lushikilisane nePirates kwaba ncane indawo, emdlalweni ophele ngo 1-1, kungekho ebifuna ukugoba uphondo. Igoli leZimnyama livalelwe phakathi wu-Augustine Mulenga ngesiwombe sokuqala kwathi elokulinganisa laMaZulu lashaywa u-Emiliano Tade ngesiwombe sesibili.
USuthu alukho endaweni enhle kwi-log ye-Absa Premiership njengoba luyibambe emsileni ngamaphuzu amathathu emidlalweni eyisishiyagalombili.
Lokhu kulandela uswazi olunzima AmaZulu aluthole kwiFifa, lwaphucwa amaphuzu ayisithupha. Yinto engamkhathaza omunye umqeqeshi ukuthi sekusondela emidlalweni eyishumi kodwa unamaphuzu amathathu vo. Nokho uJohnson uthe unethemba lokuthi uzophuma kungekudala kulolu bishi Usuthu oluzithola lukulona.
“Ngokwami bekumele silithole elinye igoli lesibili kulo mdlalo, kwaphika yona inhlanhla. Ngijabule kakhulu ngezinga lomdlalo, impela kube isikhangiso esihle sePSL. Abadlali bami balwise okwengwe, ngiyaziqhenya ngabo. Nakuba ngiphoxekile ukuthi amaphuzu amathathu asiwatholanga, ngijabule ngokuthi eKing Zwelithini Stadium asikashaywa kuze kube yimanje,” usho kanje uJohnson obelokhu egcizilele njalo ukuthi ezakhe zidlala njengeqembu, akekho umdlali ongcono kunomunye.
Ebuzwa ngokuthi isimo sinjani eqenjini ngemuva kokuphucwa amaphuzu ayisithupha, uJohnson uthe: “Ibhola lidlalwa enkundleni, ngakho okwenzeka ngaphandle kwenkundla angithandi ukukhuluma ngakho. Sengibone lukhulu mina ebholeni, ngahlangana nabantu abaningi kule ndima. Ngiyazi ukuthanda ibhola kusho ukuthini. Kwesinye isikhathi kuyenzeka ulahlekelwe amakhokho okudlala kodwa uqhubeke udlale ngezinyawo. Noma yini eyenzeka ngaphandle kwenkundla, ayiliphazamisi nakancane iqembu”.
Eqhubeka echaza uJohnson, uthe ubumbano eqenjini lakhe yilona oluzokwenza ukuthi inkinga abazithola bekuyona (yamaphuzu), isheshe ilungiseke.
“Uma uphethe iqembu, ngeqiniso nangentshisekelo, abadlali badlala ngale ndlela abami abenza ngayo. Okubalulekile njengamanje ukuthi abadlali bagcine umgqigqo, bangalinge behlise igiya abadlala ngalo. Bayakuqonda ukuthi kufanele balwe. Bayazi futhi ukuthi abakwenzayo bakwenzela ibhola, hhayi okunye,” kucacisa uJohnson.