Abantu abagibeli amaqakelo nezinkwa
MHLELI: Ngifisa ukudlulisa ukungathokozi kwami ngokuthula kukaMengameli Cyril Ramaphosa (osesithombeni) nohulumeni awuholayo lapho abantu baseNingizimu Afrika bebhekene nombhedukazwe wokunyuka kwentengo kaphethroli okwenzekile muva nje.
Lokhu kunyuka kungene emabhukwini omlando ngoba akukaze kwenzeke ngisho izwe lisacindezelwe ngamaBhunu.
Mina njengesakhumuzi esibeke ithemba laso kumengameli wezwe nohulumeni awuholayo ngizizwa ngingolahliwe nabantu abahluphekile.
Uma uhulumeni ekwazile ukungenelela ngenyanga edlule lapho uphethroli wawunyuka ngo-23c,uhlulwa yini manje ukungenelela lapho sekunzima kakhulu kubantu njengoba usunyuke ngemali engaphezulu kukaR1? Ngakube kwakuseyiyo belu ipolotiki yakulezi zinsuku yokuzama ukucosha amaphuzu ngokuhlupheka kwabantu?
Kungani uhulumeni ophethe engafuni ukulalela uma kuthiwa ake kususwe okwesikhashana le ntela efakwe elitheni elithengwayo?
Akusizi ukuthi abantu bathi bekhala ngophethroli, uhulumeni agijime ayokhipha intela emaqakelweni abesifazane nasesinkweni esimhlophe.
Abantu abagibeli amaqakelo nezinkwa uma beya emsebenzini kodwa bagibela izimoto ezibizayo ngenxa kaphethroli.
Uhulumeni akayimise le ntela ehlukumeza abantu bakithi. Okungenani ime okwesikhashana ngoba sonke siyabona ukuthi isimo simanzonzo.
Angikholwa wukuthi uhulumeni obusayo unjengalezi zinyoni okuthiwa amanqe eziphila ngezidumbu zabantu nezilwane. Uphi uhulumeni onakekelayo owathenjiswa abantu? UMbhishobhi Themba M Chonco EMTUBATUBA